Aqtóbede NZM-ǵa oqýǵa túsirýge ýáde etken muǵalim sottaldy
AQTÓBE. KAZINFORM – Muǵalimge 3 jylǵa bas bostandyǵynan shekteý jazasy taǵaıyndaldy. Ol 100 saǵat qoǵamdyq jumysqa da tartylady.
№2 Aqtóbe qalalyq sotynda Shyńǵyshan Paızovqa qatysty eki qylmystyq is qaraldy. Birinde jábirlenýshi muǵalimge 100 000 teńge berip, balasyn oqýǵa túsirmek boldy. Aldanyp qalǵanyn túsingen soń sotqa shaǵym túsirip, qylmystyq is qaralǵanymen, tatýlasýǵa sheshim qabyldady. Sebebi shyǵyn tolyq óteldi. Qylmystyq kodekstiń «Alaıaqtyq» babymen is qaraldy, alaıda sot qaýlysymen is qysqartyldy.
Keıin sotta taǵy eki ata-ananyń shaǵymy boıynsha is qaraldy. Munda da Qylmystyq kodekstiń «Alaıaqtyq» baby boıynsha sot tergeýi júrdi. Sot kabınetindegi materıalǵa súıensek, 30 jastaǵy sottalýshy Nazarbaev zııatkerlik mektebine oqýǵa túsire alatynyn aıtyp, ata-analardyń senimine kiredi. Bir ata-ana oǵan 1 700 000 teńge, al ekinshisi 1 500 000 teńge aýdarady. Sot otyrysynda Shyńǵyshat Paızov ózine taǵylǵan aıypty tolyq moıyndady. Ol 2024 jyldyń kúzinen 2025 jyldyń kóktemine deıin oqý ortalyǵynda matematıka páninen dáris beredi. Sol kezde 6 synyp oqýshylaryn Nazarbaev zııatkerlik mektebine, lıtseıge oqýǵa túsirý úshin daıyndyq sabaqtaryn ótkizedi. Ata-analarǵa habarlasyp, aqysyn tólese, zııatkerlik mektebine oqýǵa túsiretinin aıtady. Ýáde oryndalmaǵan kezde ata-analar aqshasyn talap etip, sotqa júgingen.
Sot otyrysynda jábirlenýshilerdiń shyǵyny tolyq ótelgeni, tatýlasqany belgili boldy. Al kýágerlerdiń biri sottalýshy Sh.Paızovqa óziniń bank kartasy men qosymshasyn paıdalanýǵa ruqsat bergenin, sol shaqta mol aqsha túskenin aıtty. Káýger sottalýshy muǵalimniń 6 500 000 teńge qaryzy bolǵan, ol alǵan aqshanyń bárine bás tikkenin jetkizdi. Sottalýshy sóıtip aqshany óziniń emes, dostarynyń, tanystarynyń bank esepshotyna aýdartyp otyrǵan.
Sot úkimimen Shyńǵyshan Paızov Qylmystyq kodekstiń 190-baby 3-bóligi 4-tarmaǵymen aıypty dep tanylyp, 3 jylǵa bas bostandyǵynan shekteý jazasy taǵaıyndaldy. Ol úsh jyl boıy probatsııalyq baqylaýda bolady. Eger bir aı boıy jumyssyz júrse, jumyspen qamtý bólimine baryp, tirkelýi shart. Sonymen birge 100 saǵat qoǵamdyq jumysqa tartylady.
Aıta keteıik, Aqtóbede para alǵan mektep dırektory sottaldy. Ol 250 myń teńge para alǵan. Sot 7,5 mln teńge aıyppul saldy.