Aqtóbede «Nurly jer» memlekettik baǵdarlamasy boıynsha úıler salý jalǵasýda

AQTÓBE. QazAqparat   -  Qazirgi tańda oblysta «Nurly jer» memlekettik baǵdarlamasynyń «Jeke turǵyn úı qurylysyn damytý» jáne «Tuǵyn úı qurylys jınaq júıesi arqyly nesıelik baspana qurylysy» syndy eki baǵyty júzege asyrylyp jatyr.

«Nurly jer» baǵdarlamasyna sáıkes 

jeke qurylys salýshylardy baspana salýǵa yntalandyrýdyń bir ádisi - nesıe boıynsha paıyzdyq mólsherlemeni sýbsıdııalaý quraly bolyp tabylady, dep habarlaıdy  «Aqtóbe aqparat» aqparattyq ortalyǵy.

  2017 jyldan bastap osy maqsatqa  respýblıkalyq bıýdjetten sýbsıdııalaýǵa qarjy bólindi, onda qarjy agenti - «Damý» qory.

Aqtóbede «Nurly jer» baǵdarlamasy aıasynda ekinshi qurylys kompanııasy, ıaǵnı «Hıba-Naz» JShS paıyzdyq mólsherlemeni sýbsıdııalaýǵa múmkindik aldy. Syıaqy mólsherlemesi jylyna 14% quraıdy, onyń 7% -y «Damý» qorymen sýbsıdııalanady. Nesıelik jeli «Bank TsentrKredıt» AQ-da ashyldy. Nesıe somasy - eki jyl merzimge 195 mln teńge.

Qurylysty salýshy bólingen qarajatqa ​​Aqtóbe qalasyndaǵy jalpy aýdany 5121 m2 (81 páter) bolatyn bes qabatty kóp páterli turǵyn úıdiń qurylysyn aıaqtaýdy josparlap otyr.
Aqtóbe qalasyndaǵy jańa turǵyn úı kesheni 2017 jyldyń jeltoqsan aıynda paıdalanýǵa berilmek.

Eske salaıyq, «Nurly jer» baǵdarlamasy nesıeni jeke qurylys salýshylarǵa Qazaqstan Respýblıkasynyń Ulttyq Bankiniń 10,2% bazalyq mólsherlemesinen aspaıtyn, sýbsıdııalaý týraly sheshim qabyldanǵan kezde 5% -dan astam mólsherde syıaqy mólsherlemesi boıynsha berýdi qarastyrady. Qalǵan aıyrmashylyqty qurylys salýshy ózi tóleıdi. Sýbsıdııa turǵyn úı qurylysymen aınalysatyn kásipkerlerdiń nesıeleri boıynsha usynylady.