Aqtóbede «Nurly jer» boıynsha úı salǵan kompanııa nesıeni sýbsıdııalady
AQTÓBE. QazAqparat - Aqtóbede «Nurly jer» baǵdarlamasynyń alty baǵyty boıynsha turǵyn úıler salynyp jatyr. Qurylys kompanııasy elimizde alǵash ret bankten alǵan nesıeni sýbsıdııalady, dep habarlaıdy QazAqparat tilshisi.
Aqtóbede «Nurly jer» baǵdarlamasy aıasynda 650 myń sharshy metr bolatyn turǵyn úı qurylysyn júrgizý josparlanǵan. Turǵyn úı oblys ortalyǵymen qatar Áıteke bı, Hromtaý, Baıǵanın, Yrǵyz, Qarǵaly sekildi aýdandarda júrgizilip jatyr. Elimiz boıynsha Aqtóbede alǵash ret qurylys kompanııasynyń nesıesi sýbsıdııalandy.
«Aqtóbe oblysynyń aımaqtyq úılestirý keńesi qurylys kompanııasynyń ekinshi deńgeıli bankten alǵan nesıesin sýbsıdııalady. ıAǵnı,qurylys júrgizgen kompanııa bankten 14 paıyzben nesıe alsa, ol paıyzdyq ústemeaqynyń tek teń jartysyn tóleıdi. Aqtóbedegi «Sollers» seriktestigi 9 qabatty turǵyn úı saldy. Páterdiń teń jartysy, ıaǵnı, 27-si «Nurly jer» baǵdarlamasy aıasynda «Turǵyn úı qurylys jınaq banki» arqyly satylady. Bul páter qunyn arzandatýǵa baǵyttalǵan jumys. Ózge de qurylys kompanııalaryn osy baǵyt boıynsha jumys isteýge shaqyramyz»,- dedi «Damý» qorynyń Aqtóbe oblystyq fılıal dırektory Jedelbek Myrzaǵalıev.
Aıta keteıik, baǵdarlama aıasynda salynyp jatqan turǵyn úıden páter satyp alýǵa 200-den astam adam ótinish jazǵan.
«Bıyl baǵdarlamanyń nesıelik turǵyn úı baǵyty boıynsha 1278 páter satylady. Turǵyn úı qazan aıynda paıdalanýǵa beriledi. Bul páterlerdiń ár sharshy metri 100-110 myń teńge aralyǵynda bolady. Qazaqstan boıynsha eń arzan baǵa Aqtóbede. Páter alýǵa ótinish berýshiler óte kóp. Qazir 2 myńnan astam adamnyń aryzy qabyldandy»,- dedi Turǵyn úı qurylys jınaq banki oblystyq fılıalynyń dırektory Baýyrjan Jýaspaev.
