Aqtóbede «Nurly jer» baǵdarlamasymen 273 páter berildi
AQTÓBE. QazAqparat - Aqtóbedegi «Nur Aqtóbe» aýylynda 200-den astam páter paıdalanýǵa berildi. Turǵyn úı qurylys jınaq bankine aqsha jıǵan aqtóbelikter taýnhaýstarǵa qonystandy, dep habarlaıdy QazAqparat tilshisi.
Tuńǵysh Prezıdent kúni Aqtóbede «Nurly jer» baǵdarlamasymen salynyp jatqan úılerdiń alǵashqysy qoldanysqa berildi. «Nur Aqtóbe» aýdanynda eki jylda 56 kópqabatty turǵyn úı salynýy tıis bolsa, onda 2500 páter bar. Bıyl bul jospardyń teń jartysy iske asyrylady.
«Búgin 273 páter paıdalanýǵa berildi. Turǵyn úı qurylys jınaq bankine aqsha jınaǵandar arasynda muǵalimder men dárigerler, qarapaıym turǵyndar bar. Bul aýdanda qurylys qarqyny báseńdemeıdi. Munda saıabaq, 900 oryndy mektep pen balabaqsha qurylysy júrgiziledi. Qazir barlyǵy 11 qurylys kompanııasy turǵyn úı salyp jatyr», - Aqtóbe qalasy ákiminiń birinshi orynbasary Jandos Baıyrhanov.
«Nurly jer» baǵdarlamasymen salynyp jatqan turǵyn úıdiń ár sharshy metri 120 myń teńge. Bul elimizdegi tómen baǵalardyń biri.
«Elbasy Nursultan Nazarbaev qandaı da bir qıyndyqqa, daǵdarysqa qaramastan halyqtyń turmysyn, ál-aýqatyn arttyrýǵa tapsyrma berdi. Qazaqstan halqyn turǵyn úımen qamtamasyz etý basty nazarda tur. Aqtóbede óz jospary bar. Bıyl Aqtóbede 700 sharshy metr turǵyn úı paıdalanýǵa beriledi. Ótken jyly bul kórsetkish 580 myń sharshy metr bolǵan edi. «Nur Aqtóbe» yqsham aýdany úlken qalashyq bolady. Úıler «Nurly jer» baǵdarlamasymen salynyp jatyr. Qalashyqta 4200 páter beriledi. Aldaǵy 5 jylda jańa aýdanda 100 myńǵa jýyq adam turady», - dedi Aqtóbe oblysynyń ákimi Berdibek Saparbaev.
Jańa aýdanda áleýmettik nysandar salynyp, qosymsha qoǵamdyq kólik shyǵarylady. Joldar jóndelip, emhanalar ashylady. Tipti, ózen jaǵasy demalys ornyna aınalady. Beınekamera qondyrylyp, aýlalardaǵy qaýipsizdik baqylaýǵa alynady. Jańa aýdanǵa kóship, qonys toıyn toılaǵan jas otbasy ózderiniń baıqaýdan ótkenin estigende qatty qýandy.
«Buǵan deıin biz páter jalǵa alyp, qosymsha Turǵyn úı qurylys jınaq bankinen esepshot ashqan bolatynbyz. Qujattarymyzdy jınap, jańa aýdanǵa kóshýge jospar jasadyq. Baıqaýdan ótkenimizdi estigen kezde qýanyshymyzda shek bolmady. Páter ózimizge unady. Bizdiń eki balamyz bar, ózim júrgizýshi bolyp jumys isteımin. Endi 13 jyl tóleımin. Aıyna 37 myń teńge tóleımin»,- dedi páter ıesi Almat Sholaqov.
Aıta keteıik, Táýelsizdik kúni bul aýdanda 194 kottedj paıdalanýǵa beriledi.
