Aqtóbede «Nurly jer» baǵdarlamasy boıynsha salynǵan kottedjder paıdalanýǵa beriledi
Aqtóbede turǵyn úı qurylysy qarqyndy júrip jatyr. Bıyl on aıda turǵyn úı qurylysyna 51 mıllıard teńge ınvestıtsııa salynǵan.
«Bıyl turǵyn úı qurylysyna salynǵan ınvestıtsııa 34 paıyzǵa artty. Qarjy taǵy bólinip otyr. Endi 7,4 mıllıard teńge ınfraqurylymǵa, 13 mıllıard teńge «Nurly jer» baǵdarlamasyn júzege asyrýǵa jumsalady. Biz óńirge bólingen qarajatty ıgerýimiz qajet. Barlyq nysandar belgilengen ýaqytynda tapsyrylýy tıis. Oblysta kólik joldarynyń qurylysy men kúrdeli jóndeý jumystary boıynsha úlken sharýalar júrgizilip jatyr. «Aqtóbe-Atyraý» respýblıkalyq tasjolynyń qurylysy bastaldy. Qurylys materıaldary men tehnıkalardyń kestesin jasaý kerek. Sondaı-aq, bıyl jeke turǵyn úı qurylysy úshin kem degende 14 myń jer telimin berýimiz qajet», - dedi jıyndy Aqtóbe oblysynyń ákimi Berdibek Saparbaev.
Bıyl 495,2 myń sharshy metr páter paıdalanýǵa berildi. Aqtóbe oblysy ákiminiń orynbasary Serik Tólenbergenovtyń aıtýynsha, jyl sońyna deıin taǵy 254,8 myń sharshy metr turǵyn úıdi paıdalanýǵa beriledi. Turǵyn úı qurylysy júrgizilip jatqan aýdandarǵa ınfraqurylym júrgizý úshin 6 mıllıard bólinip, ıgerildi. 
Aqtóbe oblysy ákiminiń baspasóz qyzmetiniń habarlaýynsha, bıyl jaldamaly páter qurylysyna 1,5 mıllıard teńge bólindi. Barlyǵy 300 páterli turǵyn úı qurylysy bastalǵan bolatyn. Bıyl 180 páter turǵyn úı sektorynda kezekte turǵan adamdarǵa beriledi. Al «Nurly jer» baǵdarlamasy aıasynda 122 turǵyn úıdiń qurylysy júrip jatyr. Úılerdiń bir bóligi 10 kúnnen soń paıdalanýǵa berilip, 105 páter tapsyrylady.
