Aqtóbede nóser jaýynnan soń 100-den astam assenızator táýliktik kezekshilikke shyǵaryldy
AQTÓBE. KAZINFORM — Oblys ortalyǵynda úsh kúnde aılyq normaǵa jeter jańbyr jaýdy. Qazirgi kezde sý sorý jumystaryn júrgizetin merdigerler táýliktik kezekshilikke shyqty.
Aqtóbe qalasy Astana aýdanynyń ákimi Baıanbek Qyryqbaev qalada sý sorý jumystary úzdiksiz júrip jatqanyn habarlady. Nóser jaýyn kezinde jaıaý júrginshilermen qatar kólik qozǵalysyna qıyndyq keltirip jatyr.
— Qalada jańbyr eki aptadan beri toqtamastan jaýyp tur. «Qazgıdromet» RMK AOF málimeti boıynsha osy ýaqyt aralyǵynda jarty jyldyq mólsherde jańbyr jaýdy. Mysaly jaýyn-shashynnyń bir aılyq normasy 30 mıllımetr bolsa, sońǵy úsh táýlikte 23 mıllımetr jaýdy. Qazirgi ýaqytta qala kóshelerinen sýdy sorǵylaý jumystary júrip jatyr. 100-den astam assenızator táýliktik kezekshilikke jumyldyryldy. Sonymen qatar sorǵy stantsııalary jumys istep jatyr. 109 baılanys qyzmeti turǵyndardan ótinishter qabyldaıdy, — dedi Astana aýdanynyń ákimi Baıanbek Qyryqbaev.
Aqtóbe oblystyq TJD-niń baspasóz qyzmeti erteń de qalada jańbyr jaýyp, naızaǵaı oınaıtynyn habarlady. Oblystyń batysynda, soltústiginde, ortalyǵynda burshaq jaýýy múmkin. Jeldiń ekpini 15-20 m/s bolady. Aqtóbe qalasynda da jańbyr jaýady.
Aıta keteıik, Atyraýda da 1–3 maýsym aralyǵynda aılyq jaýyn-shashyn normasynan 1,5 esege artyq jańbyr jaýdy.
