Aqtóbede nóser jaýyn kezinde kómek suraıtyn adamdar kóbeıdi
AQTÓBE. KAZINFORM — Ahýal ortalyǵyna 1500 shaqyrtý tústi. Kóbi sý sorý qyzmetin surady.
Aqtóbede áli de nóser jańbyr jaýyp tur. Assenızatorlardyń qyzmeti táýliktik rejımge kóship, 110 myń tekshe metr sý soryldy.
— Qala aýmaǵynda jańbyr sýyn tógetin 30 oryn bekitilgen. Qazirgi tańda eki aýysymmen 110 assenızator jáne 5 nasos stantsııasy, motopompalar jumysyn jalǵastyryp jatyr. Qazgıdromet málimeti boıynsha áli de bir apta nóser jaýyn bolady. Osy ýaqytqa deıin jyldyq normaǵa jýyq jańbyr jaýdy, — dep habarlady Aqtóbe qalasy ákimdigi.
Aıta keteıik, Ahýaldyq ortalyqqa bir táýlikte 1500-ge jýyq ótinish tústi. Sonyń 1200-ge jýyǵy oryndaldy. Úılerge sý kirmedi. Tek aýla ishinen sý sorý jumysy júrgizilgen. Qalalyq ákimdik sý sorý jumystary úshin keıbir kósheni ýaqytsha japty.
Eske salsaq, oblys ortalyǵynda úsh kúnde aılyq normaǵa jeter jańbyr jaýdy. Qazirgi kezde sý sorý jumystaryn júrgizetin merdigerler táýliktik kezekshilikke shyqty.
