Aqtóbede nıkel-kobolt óńdeý zaýyty men jel elektr stantsııasy salynady
AQTÓBE. QazAqparat - Aqtóbede «Aktobe Invest-2018» ınvestıtsııalyq forýmy ótti. Forýmǵa álemniń 23 elinen 400-den astam adam qatysty, dep habarlaıdy QazAqparat tilshisi.
Aqtóbe oblysyndaǵy ınvestıtsııalyq forýmǵa Qytaı men Ońtústik Koreıa, Nıderlandy, Ázerbaıjan, Reseı men Eýropa elderinen ókilder qatysty. Oblys ákiminiń orynbasary Qaırat Bekenovtyń aıtýynsha, jyl ótken saıyn ınvestorlar aýqymy keńeıip keledi.
«Aqtóbede jel elektr stantsııasy salynady. EKSPO kórmesinen keıin arnaıy top kelip, ınvestıtsııalyq jobany iske asyrý kózdelgen bolatyn. Elektr stantsııasy 48 mVt qýat óndiredi. Investıtsııa quny - 100 mıllıon eýro», - dedi Qaırat Bekenov.
«Senim. Ósý. Damý» ınvestıtsııalyq forýmyna tórt ulttyq kompanııa qatysty. Jańa jobalardyń arasynda nıkel-kobolt óńdeý zaýyty bar. Investorlar qurylys jumysyn 2019 jyly bastaıdy.
«2019 jyldan bastap Hromtaý aýdanyna ınvestıtsııa salý josparda bar. Astanadan «Dar Agroholdıng» kompanııasy kelip, nıkel-kobolt óńdeý zaýytyn salady. Búgin memorandýmǵa qol qoıyldy. Bulaqty jáne Qaraoba ken orny zerttelgen, tekserildi», - dedi «NursAlmat» JShS-niń dırektory Amangeldi Nurymbetov.
Al ǵalym Abý Meńdibaev forfor tyńaıtqyshyn salýǵa yńǵaıly óńir Aqtóbeniń Alǵa aýdany dep otyr.
«Alǵa aýdanyndaǵy forforıt tyńaıtqyshynyń múmkindigi mol. Qazir óndirilip jatqan Shıelisaıdan eki ese kóp ónim alýǵa bolady. Bul forým kezinde qytaılyq kompanııalar qyzyǵýshylyq tanytyp, kelissózge shaqyrdy. Shynyn aıtqanda, sýda qan sııaqty erıtin fosfor keniniń 2,5 mıllıard tonna qory bar. Jylyna 200 tonna tyńaıtqysh alsam, 40 jylda 5 mıllıon tonna ken qajet. Sonda Alǵadaǵy fosfor tyńaıtqyshy ǵasyrlarǵa jetetinin esepteýge bolady», - dedi Abý Meńdibaev.
Forým kezinde óńir basshysy Berdibek Saparbaev jańa jobalar óńir damýyna serpin beretinin, tsıfrly tehnologııalar ınvestorlardyń alańsyz jumys isteýine múmkindik ashqanyn aıtyp berdi.
«Árbir memlekettiń damýy memleket ekonomıkasyna keletin ınvestıtsııaǵa baılanysty. Elbasy Nursultan Nazarbaev shetel ınvestorlaryna kóp kóńil bólip keledi. Sonyń nátıjesinde Qazaqstannyń ekonomıkasy damyp, 50 damyǵan eldiń qataryna endi. Forým - ınvestıtsııa tartýdyń bir joly. Jańa tehnologııa, tsıfrlyq baǵdarlamalardy engizý joldary júrip jatyr. Investorlar qınalmaı, qoryqpaı jumys istep, jańa tehnologııalar arqyly ózine qajetti ken oryndaryn, kásiporyndy tańdaýǵa múmkindigi bar», - dedi oblys ákimi Berdibek Saparbaev.
