Aqtóbede naızaǵaı túsken er adam aman qaldy

AQTÓBE. QazAqparat - Aqtóbede mal baǵýǵa shyqqan er adamǵa naızaǵaı tústi. Ol qazir aýrýhanada jatyr, dep habarlaıdy QazAqparat tilshisi.

Oqıǵa 24-shilde kúni saǵat 08:35-te boldy. Aqtóbe oblysy TJD kezekshi-dıspetcherlik qyzmetiniń pýltine Muǵaljar aýdany Embi qalasy Úshqatty saıynyń mańynda er adamǵa naızaǵaı túskendigi jóninde habarlama kelip tústi.

«Zardap shegýshi Embi aýdandyq aýrýhanasyna jetkizildi. Qazirgi ýaqytta onyń jaǵdaıy turaqty. Derekter súıensek, 1981 jylǵy er adam maldy óriske aıdap bara jatqan. Aqtóbe oblysy TJD turǵyndarǵa qaýipsizdik erejelerin saqtaýdy eskertedi. Kóbinese naızaǵaı bıik ǵımarattarǵa, aǵashtarǵa túsedi. Sondyqtan olardan 50-60 metr qashyqtyqta bolǵanyńyz durys. Qolshatyr naızaǵaıdan qutqarmaıdy, kerisinshe apat ákelýi múmkin. Sol sebepti, jalt oınap turǵan kezde qolshatyrdy ashýǵa bolmaıdy. Naızaǵaı oınap turǵanda telefonmen sóılespegenińiz durys. Sebebi naızaǵaı keı kezde elektr baǵanalarynan ótedi»,- dep habarlady oblystyq TJD baspasóz qyzmeti.

Eske salsaq, ótken aptada Aqtóbe oblysy Shalqar aýdanynda qatty jel soǵyp, №2 mektep shatyrynyń bir bóligi ushyp ketti. Aýdany 100 sharshy metrdi quraıdy. Sonymen birge «Azamat» sport kesheniniń de shatyry zaqymdandy. Onda 50 sharshy metri ushyp ketti. Sonymen birge jeke úıdiń shatyry búlindi. Jergilikti atqarýshy bılik tarapynan 22 adam men 5 tehnıka jumyldyryldy.

Foto: bzns.media