Aqtóbede naýqastardy statsıonarlyq jáne ambýlatorııalyq emdeýge ýaqytsha qabyldamaıdy
Aqtóbe oblysynda koronavırýs ınfektsııasynyń ósimi 5,4% jetti. Oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva jańa qaýly shyǵardy.
«Barlyq medıtsınalyq uıymdarda (aýrýhanalar, emhanalar, stomatologııalyq, gınekologııalyq) naýqastardy josparly statsıonarlyq jáne ambýlatorııalyq emdeýge qabyldaýdy ýaqytsha toqtatý qajet. Emdeý mekemelerindegi karantın jalǵasady. Qashyqtan dárigerlik konsýltatsııa berý jáne qabyldaý qyzmetin uıymdastyrý qajet. Naýqasqa, júkti áıelderge, baılanysta bolǵan adamdardyń úıine barý arqyly medıtsınalyq baqylaýdy júrgizý mindetteledi. Stomatologııalyq, gınekologııalyq jáne basqa medıtsınalyq uıymdardyń jumys rejımin 8: 00-den 17: 00-ge deıin shekteledi. Emdeý mekemelerindegi kásibı medıtsınalyq, kezekti skrınıngtik jáne flıýrografııalyq tekserý ýaqytsha toqtatyldy», - dedi N.Berkimbaeva.
Sonymen birge úıde karantınde otyrǵan adamdar úshin ýaqytsha eńbekke jaramsyzdyq paraǵyn medıtsınalyq uıymdarǵa barmaı rásimdeý uıymdastyrylady. Patsıentterdi tegin ambýlatorııalyq dári-dármekpen qamtamasyz etý kezinde retsepter onlaın beriledi, úıine jetkiziledi.
«Medıtsınalyq uıymdardyń bazasynda qosymsha zerthanalar ashý arqyly halyq arasynda PTR testileýmen qamtýdy keńeıtý, aýrýhanalarda ınfektsııalyq jáne provızorlyq kereýet sanyn kóbeıtý, óńirde bar resýrstardy paıdalanyp, naýqastardy KT-zertteýmen qamtamasyz etý, úıinde jatqan patsıentterge ambýlatorlyq-emhanalyq kómek berý sapasyn arttyrý mindetteldi. Aýrýhanadaǵy medıtsınalyq qyzmetkerleriniń ózge bólimderge emin-erkin barýyn shekteý qajet. Naýqastarǵa týystarynyń kelýine tyıym salyndy», - dedi N.Berkimbaeva.