Aqtóbede nan ónimderi kombınatyna ınvestor tabylmaı jatyr
AQTÓBE. QazAqparat - Aqtóbe oblysy, Hromtaý aýdanyndaǵy nan ónimderi kombınaty 2012 jyly iske qosylǵan. Sol jyly «Eń úzdik azyq-túlik taýarlary» nomınatsııasy boıynsha óńirde jeńiske jetip, respýblıkalyq baıqaýǵa qatysty.
Degenmen kompanııa qarjylyq qıyndyqtarǵa tótep bere almaı, jumysyn toqtatýǵa májbúr boldy, - dep habarlaıdy QazAqparat tilshisi.
«Nan ónimderi kombınaty ekinshi deńgeıli bankke kepilge alynǵan. Menedjment durys júrgizilmegen bolýy kerek, qarjylyq qıyndyqtar boldy. Qazir aktsıonerlermen kezdesip, satý jóninde jumys júrgizilip jatyr. Qytaılyq, reseılik kompanııalarǵa jobany usyndyq. Biraq bank kombınattyń qunyn joǵary baǵalap otyr. Sondyqtan kombınatty qaıta iske qosyp, satyp alǵan kásipker qaryzdy keste boıynsha óteýin surap otyrmyz»,- dedi Hromtaý aýdanynyń ákimi Amanǵalı Berdalın.
Aıta keteıik, nan kombınatyndaǵy makaron tsehynda ıtalııalyq qural-jabdyq qondyrylǵan bolatyn. Sonymen qatar, Germanııadan ákelingen un dıirmeni bar. Qazir bári qańyrap, bos tur.
