Aqtóbede nan baǵasyn ósirmeý úshin aınalymǵa 600 mıllıon teńge beriledi
AQTÓBE. QazAqparat – Aqtóbede nan baǵasyn ósirmeı, turaqty ustap turý úshin bıyl aınalymǵa 160 mıllıon teńge berilse, keler jyly 600 mıllıon teńge bólinedi, dep habarlaıdy QazAqparat tilshisi.
Aqtóbede azyq-túlik qaýipsizdigin qamtamasyz etý maqsatynda birqatar shara qolǵa alyndy. Koronavırýs ınfektsııasy qaıta órship, karantın bolsa, halyqty azyq-túlikpen qamtamasyz etý jumysy josparlandy. Qazir áleýmettik mańyzy bar 32 túrli taǵam bolsa, onyń 24-i jergilikti jerde óndiriledi. Tek qaraqumyq, kúrish, qant pen tuz, sarymsaq, burysh, alma, balyq shyǵarylmaıdy.
«2020-2022 jyldary aralyǵynda 27 iri ınvestıtsııalyq joba iske asyrylady. Joba quny – 176 mıllıard teńge. Qazirgi kezde birqatary iske asyryldy. Máselen, balyq sharýashylyǵyn qolǵa alǵan kásipker jylyna 1,5 myń tonna balyq óndirmek. Kókónispen qamtamasyz etý maqsatynda 5 ga jerge jylyjaı salyp jatyr. Qurylys jumysy aıaqtaldy», - dedi oblystyq aýyl sharýashylyǵy basqarmasynyń basshysy Qusaıyn Sársembaı.
Sonymen birge alqaptan sórege tásili jıi qoldanylady. Sharýalar ónimderin birden satýǵa shyǵarady. Aýyl sharýashylyǵy jármeńkesi de uıymdastyrylady.
«Bıyl nan baǵasyn turaqtandyrý úshin qaladaǵy 4 nan shyǵarý tsehyna 160 mıllıon teńge aınalym qarjysy berildi. Jyl sońynda qarjy keri qaıtarylady. Sonymen birge keler jyly taǵy 600 mıllıon teńge qarjy berýdi josparlap otyrmyz. Qarjyny nan shyǵarý tsehyna emes, un óndirýshilerge beremiz. Sol kezde nan tsehyna qajetti un quny qoljetimdi bolady»,- Qusaıyn Sársembaı.
