Aqtóbede myńnan astam adam koronavırýs ınfektsııasynan emdelip jatyr
AQTÓBE. QazAqparat – Aqtóbede 1102 adam aýrýhanalarda koronavırýs ınfektsııasynan emdelip jatyr. Onyń 97-i jansaqtaý bólimine jatqyzylǵan, dep habarlaıdy QazAqparat tilshisi.
Aqtóbe oblysy boıynsha bir táýlikte 393 adamnan koronavırýs ınfektsııasy anyqtaldy. Onyń basym bóligi sımptomdy.
«Epıdahýal kúrdeli. Kún ótken saıyn naýqastar sany artyp barady. Sonymen birge jaǵdaıy aýyr naýqastar sany úsh esege kóbeıdi. 3-4 apta buryn 500-den astam statsıonarda jatsa, qazir myńnan asyp ketti. «Delta» shtamnyń negizgi belgilerin jıi aıtyp otyrmyz. Nebári 2-3 kúnde asqynyp ketedi. Koronavırýs ınfektsııasyna qarsy naqty em joq. Biz dene qyzýy kóterilse, ony túsiretin dári beremiz. Sonymen birge antıkoagýlıanttardy taǵaıyndaımyz. Qorǵanýdyń jalǵyz joly – vaktsına. Muny túsinip, ózińizdi, jaqynyńyzdy qorǵaý úshin ekpe saldyryńyz. Ólim kórsetkishi de kóbeıdi. Tamyz aıynda 46 adam kóz jumdy», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.
Aıta keteıik, naýqastar em qabyldap jatqan oblystyq ftızıopýlmonologııalyq ortalyq 98%, temirjol aýrýhanasy 74%, oblystyq ınfektsııalyq aýrýhanaǵa qarasty narkologııalyq dıspanser 82% toly.
«Infektsııalyq statsıonarlardyń jumys istep turǵanyna ekinshi jyl. Dárigerler moraldyq, fızıkalyq turǵyda sharshady. Júkteme óte joǵary. Soǵan qaramastan medıtsına qyzmetkerleri jumysyn jalǵastyrady. Kún ystyqta jeke qorǵanys kostıýmimen jumys isteý ońaı emes», - dedi Bekbolat Іzbasarov.
