Aqtóbede mýzykalyq-drama teatrynyń qurylysyna 8 mlrd teńge baǵyttaldy
ASTANA. KAZINFORM — Prezıdent Qasym-Jomart Toqaevtyń Aqtóbe qalasynda Tahaýı Ahtanov atyndaǵy drama teatry úshin jańa ǵımarat salý jónindegi tapsyrmasyn júzege asyrý aıasynda Úkimet rezervten 8 mlrd teńge bóldi. Bul týraly Úkimettiń baspasóz qyzmeti habarlady.
Tıisti qaýlyǵa Premer-mınıstr Oljas Bektenov qol qoıdy.
Úkimet bólgen qarjy teatr qurylysyn osy jyldyń sońyna deıin aıaqtaýǵa múmkindik beredi.
Teatr qala men aımaqtyń mádenı ómiri úshin óte mańyzdy, onyń tarıhy 80 jyldan asady.
Teatrdyń jańa ǵımaraty Altyn orda shaǵyn aýdanynda salynyp jatyr, 700 orynǵa eseptelgen teatr ónerdiń zamanaýı talaptaryna saı úlken jáne kishi zaldardan, zamanaýı repetıtsııalyq úı-jaılar men sahnalyq keńistikterden turady. Teatrdyń aınalasynda demalys ortalyqtary, saıabaq pen qala turǵyndarynyń demalýyna arnalǵan stadıon salý kózdelgen.
Jańa mádenı nysannyń qurylýy qala men oblys halqynyń eki esege jýyq ósýine baılanysty, bul mádenı ınfraqurylymdy keńeıtý jáne shyǵarmashylyq qyzmet úshin jańa alańdardyń paıda bolý qajettiligin arttyrdy. Jalpy, joba teatr qyzmetteriniń sapasyn arttyrýǵa, shyǵarmashylyq ujymdardyń jumysy úshin zamanaýı jaǵdaı qalyptastyrýǵa jáne teatr ónerin odan ári damytýǵa yqpal etetin bolady.
Tarıhı-mádenı murany saqtaý memlekettiń mańyzdy mindetteriniń biri retinde QR jańa Konstıtýtsııasynda bekitilgen. Prezıdent tapsyrmalaryn júzege asyrý aıasynda ótken jyly elimizde 61 mádenı nysan salynyp, 250-den astam mekemege jóndeý jumystary júrgizildi.
Aıta ketelik Úkimet Stepnogor jáne Kókshetaý qalalarynyń jylý jelilerin jóndeýge 3,9 mlrd teńge bólgen edi.
