Aqtóbede muz oıý jumysy bastaldy
AQTÓBE. KAZINFORM – Aqtóbe qalasynyń ortasymen aǵyp jatqan ózende muz oıý jumysy júrgizilip jatyr. Bul sý ótý úshin qajet.

Aqtóbe oblystyq TJD baspasóz qyzmetiniń habarlaýynsha, muz oıý jumysy ázirge qalada ǵana júrgizilip jatyr. Al naýryz aıynda ózenderde muz jarý jumysy atqarylady.

- Kún kúrt jylynsa sel júrýi múmkin. Sý tasqynynyń aldyn alý maqsatynda TJD basshylyǵynyń bastaýymen Jedel-qutqarý jasaǵy ózen-kólderde muz kesý jumystaryn júrgizdi. Bul sýdyń kedergisiz ótýi úshin qajet. Sonymen qatar oblystyń barlyq eldimekenderinde qar shyǵarylyp, kanaldar men aryqtar da tazartylyp jatyr. Jumystar áli de jalǵaspaq,- dep habarlady Aqtóbe oblystyq TJD baspasóz qyzmeti.

Eske salsaq, byltyr kóktemgi sý tasqyny kezinde Aqtóbeniń qaq ortasymen aǵyp jatqan Sazdy ózeni kóterilip, qaýip tóndirdi. Bir túnde sel júrip, tótenshe jaǵdaılar qyzmetkerleri, áskerıler men polıtsııa jáne eriktiler qum toly qappen jaǵasyn bekitti.