Aqtóbede munaıshylar tóbelesip, bireýi pyshaq jaraqatyn aldy
AQTÓBE. KAZINFORM — Qazir 43 jastaǵy jumysshynyń jaǵdaıy turaqty aýyr. Oqıǵadan soń qylmystyq is qozǵaldy.
Oqıǵa keshe Aqtóbe oblysy Temir aýdany Keńqııaq aýylynda boldy. Eki jumysshy janjaldasyp, biri ekinshisine pyshaq suǵyp alǵan.
— Keńqııaq aýyldyq polıtsııa bólimshesi densaýlyqqa qasaqana zııan keltirý faktisi boıynsha sotqa deıingi tergep-tekserý júrgizip jatyr. Aldyn ala tergeý barysynda anyqtalǵandaı, kásiporynnyń eki qyzmetkeri mas kúıinde janjaldasyp, saldarynan biri ekinshisine pyshaq jaraqatyn salǵan. Jábirlenýshi aýrýhanaǵa jetkizilip, medıtsınalyq mekemede em qabyldap jatyr, — dep habarlady Aqtóbe oblystyq PD baspasóz qyzmeti.
Qazirgi kezde kúdikti ýaqytsha ustaý ızolıatoryna qamaldy. Al jábirlenýshi aýrýhanada jatyr.
— 28 sáýir kúni saǵat 5:00–de Keńqııaq aýyldyq aýrýhanasyna 43 jastaǵy er adam jetkizildi. Naýqasqa barlyq medıtsınalyq kómek kórsetildi. Qazirgi kezde onyń jaǵdaıy turaqty aýyr, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.
Aıta keteıik, Aqmola oblysynda turǵyndy burynǵy synyptasy pyshaqpen jaraqattady. Oqıǵa boıynsha qylmystyq is qozǵaldy.
