Aqtóbede munaıshylar 7 jyldyq ekologııalyq ústemeaqyny talap etti
AQTÓBE. KAZINFORM — «Gas Processing Company» JShS 2019-2026 jyldar aralyǵynda ekologııalyq ústemeaqy tólemeı kelgen. 280 jumysshyǵa 1 mlrd teńgeden astam aqsha qaryz. Biraq kompanııa tekserý qorytyndysyna qarsy shaǵym túsirdi.
«Gas Processing Company» JShS-niń jumysshylary kásipodaq quryp, óz quqyǵyn talap ete bastady. Sodan beri jumys berýshimen aradaǵy qatynas qıyndaı túsken.
— Jumysshylardyń birigip, kásipodaq qurýy qıyn boldy. Bul jumys 9 aıǵa sozyldy. Sodan keıin jumysshy, jumys berýshi jáne kásipodaq úshjaqty kelisimshartqa qol jetkizdik, birge jumys isteýge kelistik. Kelisimshart kezinde 20% ekologııalyq zııan, 10% ındeksatsııa qosyldy. Alaıda osydan keıin qysym da kúsheıe tústi. Biz 2019 jyldan bastap bıylǵa deıin eseptelmegen ekologııalyq ústemeaqyny talap etip, zańdylyqty tekserý úshin eńbek ınspektsııasyna shaǵym túsirdik. Tekserýden soń 1 mlrd 20 mln teńge berejaq ekenin bildik. Men kásipodaq tóraǵasy retinde jumys isteımin, qarapaıym kompıýterim joq. Kásipodaq ashylǵan soń balaly bolsa, mereıtoıǵa aqy tóleımiz. Árqaısysy kelip, ótinish jazýy kerek, — dedi Dastan Myrzın.
Onyń aıtýynsha, «Gas Processing Company» JShS gaz óńdeıdi. Jumysshylary gaz ben kúkirttiń ortasynda júr.
Aqtóbe oblystyq eńbek ınspektsııasy basqarmasy basshysynyń mindetin atqarýshy Talǵat Iskarınniń aıtýynsha, tekserý qorytyndysy shyqty, alaıda kompanııa kelispeı, sotqa shaǵym túsirdi.
— Shaǵym tústi, tekserý boldy. Eńbek ınspektsııasy ekologııalyq ústemeaqyny óteý týraly nusqama berdi. Sonymen birge aıyppul salyndy. Qazirgi kezde kompanııa nusqamaǵa kelispeı, sotqa shaǵym túsirdi. Uıǵarym 31 shildege deıin oryndalýy kerek, — dedi Talǵat Iskarın.
Eńbek ınspektsııasynyń tekserý jumysy kezinde kompanııa birneshe zerthanalyq tekserý qorytyndysyn usyndy. Onda ekologııalyq zańnama talaptary buzylmaǵany, zııandy bólinis bolmaǵany týraly jazylǵan. Alaıda óndiris orny Baıǵanın aýdany terrıtorııasynda ornalasqan. «Aral óńirindegi ekologııalyq qasiret saldarynan zardap shekken azamattardy áleýmettik qorǵaý týraly» Zańyna sáıkes bul aýdanǵa ekologııalyq ústemeaqy mindetteledi.
Buǵan deıin habarlaǵanymyzdaı, Jezqazǵan kenshileri shahtadaǵy qural-jabdyqtyń tozǵanyn aıtyp shaǵymdandy.
