Aqtóbede munaı jáne taý-ken kompanııalary ekologııalyq zańnamalardy buzdy
AQTÓBE. KAZINFORM — Aqtóbe ekologtary munaı-gaz jáne taý-ken óndirý salasyndaǵy kompanııalardyń jumysynan kinárat tapty. Munaı uńǵymasynda apattyq jaǵdaı tirkelse, ken óndirýshi kompanııa ekologııalyq ruqsatnama almaı jumys istegen.
Aqtóbe oblystyq ekologııa departamenti bıyl 36 tekserý júrgizdi. Tekserý kezinde 261 buzýshylyq anyqtalǵan. Nátıjesinde 3 mlrd teńgege aıyppul salyndy, 24 is boıynsha ákimshilik hattama toltyrylyp, sotqa jiberildi.
— Tekserý kezinde «Sagız Petroleým Kompanı» JShS-de ekologııalyq talaptardyń buzylǵany anyqtaldy. Kompanııaǵa 5 ákimshilik hattama toltyrylyp, 15,8 mln teńge kóleminde aıyppul salyndy. Al «AltynEX Company» AQ-na 1,6 mln teńge aıyppul tóleıdi. «SNPS-Aqtóbemunaıgaz» AQ-nyń «Keńqııaq» ken ornyndaǵy uńǵymada apatty jaǵdaı boldy. Jospardan tys tekserý kezinde 2,7 mln teńge aıyppul salyndy. «QazHrom» TUK» AQ Dón ken-baıytý kombınatyna júrgizilgen tekseristen soń 11 ákimshilik hattama toltyryldy. Barlyǵy 5 ákimshilik hattama boıynsha 38,6 mln teńge aıyppul salyndy. Al 6 ákimshilik hattama sotta qaralyp jatyr. Sonymen qatar Aqtóbe oblysynyń mamandandyrylǵan tabıǵat qorǵaý prokýratýrasynyń qaýlysyna sáıkes «Voshod Hrom» JShS-ne ekologııalyq ruqsat almaǵany úshin 2,9 mlrd teńge aıyppul salyndy. Búgingi kúni barlyq aıyppul óndirildi, — dedi Aqtóbe oblystyq ekologııa departamentiniń bólim basshysy Turar Qojanov.
Qazirgi kezde ekologtardyń sheshimimen kelispegen kompanııalar sotqa aryz túsirdi. Olardyń arasynda kommýnaldyq mekeme, qoqys polıgonyna ıelik etetin kompanııa bar. Sonymen birge Dóń ken-baıytý kombınaty, Aqtóbe mys kompanııasy da tekserý taǵaıyndaý aktisiniń kúshin joıýdy suraǵan. Al sý qory tol «Kókjıde» aýmaǵyn qorǵaý jumysy ári qaraı jalǵasa beredi.
— Ekologııa jáne tabıǵı resýrstar mınıstrligi, Energetıka mınıstrligi kelisip, «Kókjıde» ken ornyndaǵy uńǵymalardy birtindep jabý jumysy bastaldy. Munda 5 kompanııa jumys isteıdi. «Ýrıhtaý Opereıtıng» JShS-i 2023 jyly bir, bıyl bir, «SNPS-Aqtóbemunaıgaz» AQ-y 2024 jyly bir uńǵymasyn jabýy tıis edi. Bul jumys aıaqtalyp qaldy. Al 2025-2026 jyly basqa kompanııalardyń uńǵymasy joıyla bastaıdy. Tapsyrmaǵa saı bul jerlerde qosymsha zerdeleý jumystary da júrgiziledi. Onda sý sapasy men sý qorynyń munaımen lastanyp nemese laılanbaǵany anyqtalady. Ekologııa departamentiniń Jol kartasynda «Kókjıde» shekarasyn anyqtaý kórsetildi. Ony oblystyq tabıǵı resýrstar jáne tabıǵatty paıdalanýdy retteý basqarmasy júrgizedi, — dedi Turar Qojanov.
Eske salsaq, «Kókjıde» ken ornynda elimizdiń batys óńirin qamtýǵa jetetin mol sý qory bar. Qazirgi kezde ol aýmaqta munaı óndirilip jatyr.
