Aqtóbede munaı urlaǵandar kúzet qyzmeti bastyǵyna aıyna 300 myń teńge bermek boldy

Aqtóbede Erkin Іzbasar, Aýhat Qalıev bastaǵan uıymdasqan topqa qatysty qylmystyq isti qaraý jalǵasyp jatyr. Qazirgi kezde «Aşykól», «Qaǵanaı», «Qaratóbe», «Sınelnıkovskıı» ken oryndaryndaǵy munaıdy urlaý isteri qaralýda. Búgin kýáger, «AzııaGrýppSekıýrıtı» JShS-inde jumys isteıtin Jádiger Aımahanov jaýap berdi. Ol buryn quqyq qorǵaý salasynda, 2015 jyldan bastap munaı kompanııalaryn kúzetetin seriktestikti basqardy.

«Men kúzet kompanııasynda 2015 jyldan beri jumys isteımin. Bizdiń kúzet aımaǵyna «SNPS-Aqtóbemunaıgaz» AQ-nyń Jańajol gaz óńdeý zaýytttary, munaı saqtaý, tasymaldaý kiredi. Sonymen qatar, munaı qubyrlaryn qaraımyz. Bir kúni maǵan Saıasat Dúsipov telefon shaldy. Bul 2016 jyldyń mamyr aıy bolatyn. Ol bılıard oınaıtyn jerge shaqyryp, bir adamdy kútip otyrǵanymyzdy eskertti. Biraq eshkim kelmegen soń áńgimeni bastady. Ol oblystyq Іshki ister departamenti bastyǵynyń orynbasary Rahat Ahanovty tanıtynyn jetkizdi. Ári munaı urlaý joldaryn biletinin aıtty. Saıasat munaı urlyǵy kezinde kúzet qyzmeti kedergi keltirmeýi úshin aıyna 300 myń teńge usyndy. Al mobıldi topqa 50 myń teńge beretin boldy. Biraq men bárinen bas tarttym», - dedi kýáger Jádiger Aımaǵambetov. Keıin sottalýshy Saıasat Dúsipov birneshe ret telefon shalyp, kezdesýdi suraǵan. Biraq kýáger baılanys jasamaı, óz qyzmetkerleri arasynda kúdikke ilikkenderdi jumystan shyǵarǵan.
 

Aıta keteıik, kýáger Erkin Іzbasardy tanymaıtynyn jetkizdi. Al buryn Aqtóbe oblystyq ІІD bastyǵynyń orynbasary bolǵan Rahat Ahanovty bir ret 2011 jyly medal alý kezinde kórgen.

Eske salsaq, Aqtóbe oblystyq qylmystyq ister jónindegi mamandandyrylǵan aýdanaralyq sotynda munaı urlyǵyna qatysty uıymdasqan qylmystyq top isi qaralyp jatyr. Barlyǵy 26 adam 2003-2016 jyldardaǵy qylmystyq is boıynsha jaýap berýde.