Aqtóbede munaı urlaǵan qylmystyq topty qamaý merzimi 1 aıǵa uzartyldy
AQTÓBE. QazAqparat - Aqtóbede munaı urlyǵyna qatysty uıymdasqan qylmystyq top músheleri áli ustalyp jatyr. Prokýrorlardyń ótinishi boıynsha qylmystyq top jetekshisi Erkin Іzbasardy tutqynda ustaý sanktsııasy 7 naýryzǵa deıin uzartyldy, dep habarlaıdy QazAqparat tilshisi.
Ótken jyldyń jeltoqsan aıynda «aǵaıyndy tórteý» degen laqap atpen aty shyqqan Erkin Іzbasar «munaı urlady» degen kúdikpen ustalǵan bolatyn. Qazirgi ýaqytta Aqtóbede uıymdasqan qylmystyq top múshelerin ustaý operatsııasy áli júrip jatyr. Oblystyq sottyń baspasóz qyzmetkeri Ilıada Dosovanyń aıtýynsha, 3 aqpan kúni taǵy eki kúdikti qolǵa túsip, sot 2 aı tergeý oqshaýlaǵyshyna qamaý týraly sheshim shyǵarǵan.
«Munaı urlyǵyna qatysty qylmystyq toptyń 15 múshesine qatysty sanktsııa merzimi taǵy bir aıǵa uzartyldy. Al top jetekshisi Erkin Іzbasarǵa keler bolsaq, 4 aqpan kúni ótinish túsip, 7 naýryzǵa deıin sozyldy. Munaı urlyǵyna qatysty qamaýǵa alý túrindegi bultartpaý sharasy barlyǵy 20 kúdiktige qoldanyldy»,- dedi Ilıada Dosova.
