Aqtóbede munaı tasymaldaýshy kóligimen birge janyp ketti
AQTÓBE. QazAqparat - Aqtóbeniń Baıǵanın aýdany, Qopa aýylyna jaqyn mańda munaı tıegen KamAZ kóligi aýdarylyp qaldy. Júrgizýshi tirideı janyp ketti, dep habarlaıdy QazAqparat tilshisi.
Aqtóbe oblysy, Baıǵanın aýdany, Qopa aýylynda tótenshe oqıǵa tirkeldi. KamAZ kóliginiń júrgizýshisi rýlge ıe bola almaı, aýdarylǵan.
«Qopa aýylynan 3 shaqyrym qashyqtyqta jol-kólik oqıǵasy tirkeldi. 52 jastaǵy kólik júrgizýshisi tirkemesi bar KamAZ kóliginiń rýline ıe bola almaı qalǵan. Kólik aýdarylyp, kabınasy jandy. Saldarynan júrgizýshi oqıǵa ornynda kóz jumdy»,- dedi oblystyq ІІD baspasóz qyzmeti jetekshisiniń mindetin atqarýshy Nurgúl Qonaqbaeva.
Aıta keteıik, osy oqıǵa boıynsha Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha is qozǵalyp, tergeý bastaldy. KamAZ júrgizýshisi «Saǵyz Petrolıým Kompanı» JShS-niń munaıyn tasymaldaǵan. Tasymaldaý qyzmetin «Jangereev» JK kórsetken. Júk kóligi de jeke adamdarǵa tıesili.
