Aqtóbede munaı kompanııalary jerasty sýyn áli lastap jatyr
AQTÓBE. QazAqparat - Aqtóbedegi iri munaı kompanııalary jerasty sýyn lastap jatyr. Bul týraly Aqtóbe oblystyq tabıǵı resýrstar men tabıǵatty paıdalaýdy retteý basqarmasynyń basshysy Nurjan Aqqul aıtty, dep habarlaıdy QazAqparat tilshisi.
Aqtóbedegi Kókjıde qum alqabynda munaı men tuşý sý qorybar. Aýmaǵy 43 myń gektar bolatyn jerde «Ada Oıl», «KMK Munaı» JShS-i men «SNPS-Aqtóbemunaıgaz»AQ-y munaı óndirip jatyr. Tuşy sýdyń quramyn jylyna tórt ret tekseretin oblystyq tabıǵı resýrstar men tabıǵatty paıdalaýdy retteý basqarmasy sýdyń lastaný deńgeıi azaıyp kele jatqanyn aıtyp otyr. Biraq munaı kompanııalary aýyz sýdy túbegeıli qorǵaý tehnologııasyn áli qoldanbaı otyr. «Kókjıde qum alqaby jerasty tuşy sý ken ornyn saqtaý maqsatynda buryn qurylǵan gıdrogeologııalyq uńǵyma toraby arqyly sýdyń sapasyna baqylaý júrgizilip keledi. Monıtorıng júrgizilgen ýaqyttarda sýdyń quramynda munaı, aýyr metaldar jáne taǵy da basqa lastaýshy zattar anyqtalyp otyr. Derekter boıynsha salalyq mınıstrliktermen tıisti jumystar júrgizilýde», - dedi Aqtóbe oblystyq tabıǵı resýrstar men tabıǵatty paıdalanýdy retteý basqarmasynyń basshysy Nurjan Aqqul.
Aqtóbede aýany lastaıtyn tórt iri kompanııa bar. Olar munaı-gaz, metallýrgııa salasyndaǵy iri óndiris oryndary. Máselen, «SNPS-Aqtóbemunaıgaz» AQ, «QazaqOıl» JShS, «Qazhrom» TUK» AQ, «Intergaz Ortalyq Azııa» AQ-nyń oblystyq fılıaly bir jylda 169 myń tonna qaldyqty aýaǵa tastaǵan. Onyń basym bóligi munaı kompanııalaryna tıesili. Aýaǵa tastalǵan hımııalyq elementter arasynda adam densaýlyǵyna asa zııandy formaldegıd, benzıpıren, hrom, kúkirtti sýtek bar. Mamandardyń aıtýynsha, 2015 jylǵa qaraǵanda Aqtóbede aýany lastaý kórsetkishi artqan. Sebebi, óńirde birneshe iri óndiris orny iske qosyldy. Onyń ishinde Aqtóbe rels-arqalyq zaýyty, Aqtóbe ferroqorytpa zaýytynyń №4 tsehy bar.
