Aqtóbede munaı qaldyqtaryn saqtaıtyn polıgon jabylýy múmkin
AQTÓBE. QazAqparat - Aqtóbe oblysy, Baıǵanın aýdany, Jańatań aýylynda munaı qaldyqtaryna arnalǵan polıgon jabylýy múmkin, dep habarlaıdy QazAqparat tilshisi.
Aqtóbe oblystyq ekologııa departamenti «Taza Tabıǵat-AN» JShS-ne tekserý júrgizip, birneshe zańsyzdyqty anyqtady. Aýmaǵy 11 gektar bolatyn polıgon aýyldan 7 shaqyrym qashyqtyqta ornalasqan.
«Oblys prokýratýrasynyń tapsyrmasy boıynsha 2018 jyldyń maýsym-shilde aılarynda QR Ulttyq ekonomıka mınıstrliginiń Ekologııalyq retteý jáne baqylaý komıtetiniń qyzmetkerleri «Taza Tabıǵat-AN» JShS-ne jospardan tys tekserý júrgizdi. Polıgonǵa belgilengen lımıtten tys qaldyq tógilip, esepke alý júrgizilmegen. Arnaıy konteınerler de bolǵan joq», - dep málimet taratty Aqtóbe oblystyq ekologııa departamenti.
Tekserýden soń kompanııaǵa 336 myń teńgeden astam ákimshilik aıyppul salyndy. Alaıda kompanııa áli kúnge deıin aıyppuldy tólemedi. Endi Óńirlik kásipkerlik palatasy jeke sot oryndaýshylary arqyly májbúrlep óndirip alý sharalaryn qabyldaıdy. Al Ekologııa departamenti Aqtóbe oblysynyń mamandandyrylǵan aýdanaralyq ekonomıkalyq sotyna siltili qaldyqtardy beıtaraptandyrý qondyrǵysyn paıdalaný boıynsha sharýashylyq qyzmetti toqtatý úshin talap-aryz joldady.
Osyǵan deıin Aqtóbede zańsyz munaı óńdeýmen aınalysqan zaýyt anyqtalǵan bolatyn.
