Aqtóbede munaı qaldyǵyna arnalǵan rezervýardyń janý sebebi anyqtaldy
AQTÓBE. QazAqparat – Jańajol ken ornyndaǵy munaı qaldyǵyna arnalǵan rezervýar dánekerleý jumystary kezinde órtendi, dep habarlaıdy QazAqparat tilshisi.
«SNPS-Aqtóbemunaıgaz» AQ-nyń Jańajol munaı-gaz óńdeý kesheninde rezervýar órtendi. Oqıǵa 8 qańtar kúni saǵat 18:20-da tirkeldi. Órt arada 4 saǵat ótkende sóndirildi.
«Kólemi 3 000 tekshe metr bolatyn munaı qaldyǵyna arnalǵan rezervýar órtendi. Rezervýar qoldanylmaıdy, avarııalyq jaǵdaıǵa arnalǵan. Órtti sóndirýge 8 tehnıka men 35 adam jumyldyryldy. Qosymsha TJD bastyǵynyń mindetin ýaqytsha atqarýshy A.Tóleshevtiń basshylyǵymen Aqtóbe qalasynan 25 qyzmetker men 5 tehnıka jiberildi. Órt saǵat 22:59-da tolyq sóndirildi. Qaza bolǵandar men zardap shekkender joq. Órttiń shyǵý sebebi – dánekerleý jumystaryn júrgizý kezinde órt qaýipsizdigi erejelerin saqtamaý»,- dep habarlady oblystyq TJD baspasóz qyzmeti.
