Aqtóbede munaı qaldyqtaryn óńdep, 393 mln teńge tapqan kásiporyn basshysy sottaldy
ASTANA. KAZINFORM — Aqtóbede qaýipti munaı qaldyqtaryn tıisti lıtsenzııasyz óńdep, 393 mln teńge tabys tapqan kásiporynnyń basshysy sottaldy. Zańsyz jolmen alynǵan qarajat memleketke qaıtaryldy.
Aqtóbe oblysynyń tabıǵatty qorǵaý prokýratýrasy «JAN-AMI ı K» JShS-niń zańsyz qyzmetiniń jolyn kesti. Tekserý barysynda kásiporynnyń 2024–2025 jyldary tıisti memlekettik lıtsenzııasyz 1 400 tonnadan astam qaýipti munaı qaldyqtaryn qaıta óńdegeni anyqtaldy.
Zańsyz qyzmetten seriktestik 393 mln teńge tabys tapqan.
Prokýratýra materıaldary boıynsha sotqa deıingi tergep-tekserý bastalyp, isti Ekonomıkalyq tergep-tekserý departamenti júrgizdi.
— 17 tamyzda Aqtóbe qalasynyń № 2 soty seriktestik dırektoryn Qazaqstan Respýblıkasy Qylmystyq kodeksiniń 214-baby 2-bóliginiń 2-tarmaǵynda kózdelgen qylmystyq quqyq buzýshylyqty jasaǵany úshin kináli dep tanydy. Sot oǵan múlkin tárkileı otyryp, 2 jyl 6 aıǵa bas bostandyǵyn shekteý jazasyn taǵaıyndady. Alaıda «Raqymshylyq týraly» zań negizinde sottalǵan adam negizgi jazadan bosatyldy, — delingen habarlamada.
Sonymen qatar zańsyz alynǵan 393 mln teńge memleket kirisine óndirildi. Sot úkimi apellıatsııalyq satyda ózgerissiz qaldyrylyp, zańdy kúshine endi.
Eske salaıyq, munyń aldynda Shymkentte zańsyz onlaın-kazıno uıymdastyrǵan eki adam sottalǵanyn habarlaǵanbyz.
