Aqtóbede munaı-gaz salasy mamandarynyń eńbegi elendi
AQTÓBE. KAZINFORM - Aqtóbede Qazaqstan munaıynyń 125 jyldyq mereıtoıyna arnalǵan saltanatty is-shara ótti.
«Óner ortalyǵynda» uıymdastyrylǵan merekelik keshke Aqtóbe oblysynyń ákimi Ashat Shaharov, «QazMunaıGaz» ulttyq kompanııasynyń Basqarma tóraǵasy Ashat Hasenov, Energetıka vıtse-mınıstri Qudaıbergen Arymbek, sala ardagerleri men basqa da qurmetti qonaqtar qatysty.
Óńir basshysy Ashat Shaharov munaı men gazdy óndirýge úles qosyp júrgen qyzmetkerlerdi aıtýly kúnmen quttyqtady, salanyń mańyzdylyǵyna toqtaldy. Óńirde munaı-gaz salasynda 16 munaı-gaz óndirýshi kompanııa jumys isteıdi.
«El Prezıdenti Qasym-Jomart Kemeluly Toqaev otyn-energetıka kesheniniń Qazaqstan ekonomıkasynda úlken ról atqaratynyn únemi aıtyp keledi. Aqtóbe oblysy – Qazaqstannyń iri ónerkásiptik aımaqtarynyń biri. Óńirde munaı-gaz salasynyń damýyna 16 munaı-gaz óndirýshi kompanııa úles qosyp keledi. Jyl saıyn bul kompanııalar 4,5 mln tonna kóleminde munaı jáne 5 mlrd tekshe metr kóleminde gaz óndirýde. Al óndiris pen qyzmet kórsetý salalarynda 13 myńǵa jýyq otandasymyz tabysty eńbek etip júr. «Qazmunaıgaz» aktsıonerlik qoǵamy, oǵan qarasty enshiles kompanııalar Aqtóbe oblysynyń áleýmettik-ekonomıkalyq kórsetkishteriniń oń nátıje kórsetýine septigin tıgizýde. Sonymen qatar, kompanııanyń qoldaýymen eldi mekenderdi gazdandyrý, bilim berý, densaýlyq saqtaý jáne basqa da kóptegen mańyzdy áleýmettik jobalar júzege asyrylýda. Osy bastamalardyń barlyǵy óńirdegi ómir sapasyn arttyrýǵa jáne áleýmettik turaqtylyqty nyǵaıtýǵa yqpal etedi», - dedi óńir basshysy.
Munaı-gaz kompanııalary óńirlerde ınfraqurylymdy jaqsartý, jańa jumys oryndaryn ashý jáne jergilikti halyqty qoldaýǵa baǵyttalǵan áleýmettik jobalar men baǵdarlamalardy iske asyra otyryp, olardyń áleýmettik-ekonomıkalyq damýyna eleýli úles qosyp keledi.
Ashat Hasenov te quttyqtaý sózinde munaıshylarǵa janqııarlyq eńbegi men mamandyǵyna degen adaldyǵy úshin alǵys bildirip, kompanııanyń Qazaqstannyń ósip-órkendeýine tıgizgen septigin tilge tıek etti.
«125 jyl ishinde Qazaqstannyń munaı-gaz salasy elimizdiń ekonomıkalyq damýynyń qozǵaýshy kúshine aınaldy. Osy jyldar ishinde sala túrli kezeńderden ótti. Munaıshylardyń eńbegi eldiń energetıkalyq áleýetin damytýǵa ǵana emes, óńirdiń ál-aýqatyn jaqsartýǵa yqpal etedi. Qıyndyqty moıymaı kótergen ardagerlerimizdiń adal eńbegine qurmetimiz erekshe, alǵysymyz sheksiz. Sonyń arqasynda biz eńsemizdi tik kóterip, erteńgi kúnge senimmen qaraımyz», - dedi «QazMunaıGaz» basshysy Ashat Hasenov.
«Qazaqoıl Aqtóbe» JShS Muǵaljar aýdanyndaǵy Jarkemer aýylyn gazdandyrý jumystaryn, al 2024 jyly Qojasaı aýylynda greıderlik jol jáne Sheńgeldi, Qojasaı men Temirkópir aýyldarynda balalar alańdaryn salý jobasyn qarjylandyrdy. Sonymen qatar Muǵaljar aýdanynyń Qandyaǵash qalasyndaǵy balabaqshanyń materıaldyq bazasyn qalyptastyrýǵa qarajat bóldi.
«Qazaqtúrikmunaı» JShS Aqtóbe oblysy Baıǵanın aýdany Jarqamys aýylynyń turǵyndaryn óteýsiz negizde gazben qamtamasyz etedi. Budan bólek, 2015 jyldan beri kompanııa óziniń elektr stantsııasynda óndirilgen artyq elektr energııasyn aýdannyń sharýa qojalyqtaryna tegin berip keledi.
Mereke barysynda munaı óndirýshi kásiporyndardyń úzdik qyzmetkerleri marapattaldy. «QazMunaıGaz» kompanııalar tobyna qarasty «Qazaqoıl Aqtóbe» JShS, «Óriktaý Opereıtıng» JShS, «Qazaqtúrikmunaı» JShS, «Ýral Oıl end Gaz» JShS jáne «QazTransOıl» AQ Aqtóbe munaı qubyry basqarmasynyń qyzmetkerlerine mereıtoılyq tósbelgiler, qurmet gramotalary men alǵys hattar tabystaldy.
