Aqtóbede múmkindigi shekteýli jandar jumysqa ornalasýǵa joldama aldy
AQTÓBE. QazAqparat -Aqtóbe oblysynyń ákimi Berdibek Saparbaev eńbekke qabiletti múmkindigi shekteýli jandarǵa joldama berdi. Endi olar túrli kásiporyndar men ákimdikterde jumys isteıdi, dep habarlaıdy QazAqparat tilshisi.
Aqtóbede «Biz birgemiz» atty qaıyrymdylyq aktsııasy ótti. Aktsııaǵa jumys berýshiler men jumys izdep júrgen múmkindigi shekteýli jandar qatysty. Aqtóbe qalalyq sal aýrýyna shaldyqqan azamattardy qoldaý ortalyǵynyń jetekshisi Quralaı Baımenovanyń aıtýynsha, aktsııa aıasynda 50 adam jumysqa joldama alady. Olar aldaǵy ýaqytta ákimdik, memlekettik mekemeler men óndiris oryndarynda jumys isteıdi.
«Múmkindigi shekteýli jandar úıde otyryp zeınetaqy alý oıyn artqa tastap, jumys isteýge talpynyp jatyr. Arbaǵa tańylǵan adamdar úshin ІT tehnologııa qyzyqty. Kópshiligi osy salany tańdaıdy. Sonymen qatar, qolóner sheberleri de bar. Olar ózderi jasaǵan buıymdy satýǵa shyǵarady»,- dedi Quralaı Baımenova.
Óz erkimen júre almasa da oıy zerek adamdar úshin bir orynda otyryp jumys isteýge múmkindik bar. Kásipkerler men mekeme basshylary da ІІ, ІІІ top múgedekterine jumys berýge kelisti.
«Aqtóbe oblysy boıynsha 5 myńǵa jýyq múmkindigi shekteýli jan jumys isteıdi. Jyl saıyn 700-800 adamdy jumyspen qamtýǵa kúsh salamyz. Degenmen biz árqaısysynyń eńbekke aralasqanyn qalaımyz. Qazaqta «birlik túbi tirlik» degen sóz bar. Tirlik bolsa, jaǵdaıymyz jaqsy bolady. Múmkindigi shekteýli jandardy jumyspen qamtý aktsııasy tek Aqtóbe óńirinde emes, Qazaqstannyń barlyq oblysynda ótip, qoldaý tabatyna senimdimiz», - dedi Aqtóbe oblysynyń ákimi Berdibek Saparbaev.
Múgedekterdi jumyspen qamtyp otyrǵan mekemeler arasynda Qazaqstan temir joly bar. «QJT» UK» AQ Aqtóbe oblystyq fılıaly, Aqtóbe magıstraldi jeli mekemesiniń kadr mamany Aısha Qalaǵanovanyń aıtýynsha, qazir temirjol salasynda 28 múmkindigi shekteýli jan jumys isteıdi.
«Kompanııada jumys isteıtin múmkindigi shekteýli jandardyń 11-i óndiristik jaraqat alyp, jumys ornyn saqtady. Al ózge adamdar ІІ, ІІІ top múgedekteri. Olardyń arasynda esepshi, ınjener mamandar bar. Biz aldaǵy ýaqytta birneshe adamdy jumysqa alamyz», - dedi ol.
