Aqtóbede múmkindigi shekteýli jandar men jetim balalar baspanaly boldy
AQTÓBE. QazAqparat - Aqtóbede on jyldan astam páter kezeginde turǵan adamdar baspanaly boldy, dep habarlaıdy QazAqparat tilshisi.
2006 jyldan beri óz kezegin kútip júrgen Aqtóbe qalasynyń turǵyndary baspanaly boldy. Táýelsizdik kúni qarsańynda oblys ákimi Ońdasyn Orazalın 30 otbasyǵa páter kiltin tabystady. Olardyń qatarynda UOS qatysýshylaryna teńestirilgender, tolyq emes, múmkindigi shekteýli bala tárbıelep otyrǵan otbasy, 1, 2 top múgedekteri, jetim balalar bar. Olar Nur Aqtóbe shaǵyn aýdanyndaǵy toǵyz qabatty úıden bir, eki, úsh bólmeli páterge ıe boldy.
«Memleket basshysynyń syndarly saıasatynyń arqasynda el ekonomıkasy qarqyndy damyp, halyqtyń turmys sapasyn arttyrý jónindegi saıasaty qarqyndy iske asyrylyp jatyr. Oblys ortalyǵynyń ózinde 24 myńnan astam adam úı kezeginde tur. Olardyń baspanaly bolýy úshin kóp qabatty úılerdi salý jumystary belsendi júrgizilýde»,- dedi Ońdasyn Orazalın.
Jańa úıde múmkindigi shekteýli azamattardyń kirip-shyǵýyna qolaıly jaǵdaı jasalǵan. 
Máselen, kire beriske elektrondy kótergishter ornatylǵan. Kásipker, «Pandýs Ok» JShS basshysy Shahan Joldasbaev kótergishterdiń qalaı jumys isteıtinin tanystyrdy. 
Aıta keteıik, bıyl kezekte turǵan 782 adamǵa jaldamaly-kommýnaldyq páter usyný josparlanyp otyr. Olardyń ishinde 252 otbasy jańa qonys toıyn toılady. «Baqytty otbasy» baǵdarlamasy aıasynda 3 mlrd teńgege 302 ótinish maquldandy. «Shańyraq» - «5-10-20» baǵdarlamasy aıasynda 278 otbasyǵa jalpy somasy 2,38 mlrd teńgege nesıe berildi.
