Aqtóbede múmkindigi shekteýli balalarǵa arnalǵan saýyqtyrý lageri ashyldy
AQTÓBE. QazAqparat - Aqtóbe oblysy Alǵa aýdanyndaǵy Bestamaq aýylynda saýyqtyrý lageri ashyldy. Jyl boıy jumys isteıtin lagerde múgedek balalarmen qatar deni saý balalar da demalady, dep habarlaıdy QazAqparat tilshisi.
Munda múmkindigi shekteýli balalar jyl boıy úzdiksiz em alyp, densaýlyǵyn ońaltady. Al mektep oqýshylary demalys kezderi tynyǵady. Bul múgedek balalardyń qurby-qurdastarymen qatar ósýine jasalǵan múmkindik. Ári on eki múshesi saý balalar óz erkimen júre almaıtyn, asa kóp kútimdi qajet etetin balalardy kórip, qoǵamǵa beıimdelip ósedi.
«1964 jyly salynǵan ǵımarat qaıta jóndelip, erekshe kútimdi qajet etetin balalarǵa arnalǵan lager ashyldy. Lagerde 4 korpýs bar. Jyl boıy úzilissiz jumys isteıtin lagerdiń ınjenerlik ınfraqurylymy tolyq jańartylyp, jabdyqtaldy. Aıyna eki ret bala qabyldanady. Máselen, týa bitti sal aýrýyna shaldyqqan balalar ata-analarymen birge demalady. Aldaǵy ýaqytta pedagogıkalyq, medıtsınalyq oqý oryndarynda bilim alyp júrgen stýdentter tájirıbeden ótedi», - dedi Aqtóbe oblystyq bilim basqarmasynyń basshysy Lázzat Orazbaeva.
Lagerde klýb, amfıteatr bar. Dárigerlik beket te ornalasqan. Bıyl bul lager 107 balany qabyldaı alady. Ár maýsym saıyn sal aýrýyna shaldyqqan 12-15 bala kelip, em qabyldaıdy. «Keler jyly 350 bala demalyp, emdeledi. Bul jerde erekshe kútimdi qajet etetin balalar men qarapaıym balalar birge demalady. Bul jerdiń tabıǵaty jaqsy ári Eset batyr kesenesi janynda ornalasqan. Munda ıppoterapııa bolady. Ári jabyq basseın jasalady», - dedi Lázzat Orazbaeva.
Elimizdegi alǵashqy saýyqtyrý lageriniń ashylýyna Memlekettik hatshy Gúlshara Áldiqalyqova qatysty.
«BUU-nyń múmkindigi shekteýli azamattardy qoldaý, qorǵaý týraly konventsııasy bar. Qazaqstan soǵan qol qoıyp, josparly túrde ártúrli is-shara ótkizilip jatyr. Arnaýly zańdar qabyldanyp, standarttar belgilendi. Erekshe balalarǵa arnalǵan lager birinshi ret Aqtóbede iske qosylyp jatyr. Bul ortalyq jyl boıy jumys isteıdi. Kórgenimizdeı, barlyq jaǵdaı jasalǵan. Tamaqtandyrý, fızıoterapııa, ıppoterapııa, ata-analar men balalardyń birge demalý alańy, psıholog qyzmeti bar. Múgedek balalardy emdeýdi erte qolǵa alatyn bolsaq, olar qoǵamǵa jaqsy densaýlyqpen oralady degen úmitimiz bar. Osyndaı ortalyqtar respýblıkamyzdyń barlyq jerinde bolýy kerek», - dedi Memlekettik hatshy Gúlshara Ábdiqalyqova.
