Aqtóbede múmkindigi shekteýli balalarǵa arnalǵan balabaqsha ashyldy
AQTÓBE. QazAqparat - Aqtóbe qalasynda týa bitti sal aýrýyna shaldyqqan, Daýn sındromymen týǵan balalar balabaqshamen qamtyldy, dep habarlaıdy QazAqparat tilshisi.
Aqtóbe qalasynyń Batys-2 yqshamaýdanyndaǵy balabaqshada buǵan deıin qarapaıym balalar tárbıelendi. Oblysta múmkindigi shekteýli balalardyń ata-analarynan suranys artyp, memlekettik-jekeshelik seriktestik aıasynda salynǵan balabaqsha qaıta jóndelip, erekshe dıagnozben týǵan balalarǵa berildi. «Baqytty bala» jobasy aıasynda ashylǵan balabaqshada 180 bala tárbıelenedi.
«Memleket basshysynyń tapsyrmasy boıynsha erekshe qajettilikteri bar balalarǵa basa nazar aýdarylady. Bizdiń mindetimiz - olardy elimizdiń laıyqty azamattary retinde tárbıeleý úshin jaqsy jaǵdaı jasaý. Osy maqsatta 2018 jyl oblysta «Baqytty balalyq shaq» jyly dep jarııalandy. «Baqytty bala» jobasynyń aıasynda kóptegen is-sharalar, qaıyrymdylyq aktsııalar ótkizilip, erekshe balalarǵa arnalǵan birqatar mańyzdy áleýmettik nysandar ashý josparlanyp otyr. Atap aıtqanda, psıhologııalyq-medıtsınalyq-pedagogıkalyq keńes berý, týa bitti sal aýrýy jáne aýtızmge shaldyqqan balalarǵa arnalǵan alǵashqy ońaltý ortalyǵy, múmkindigi shekteýli balalarǵa arnalǵan jyl boıy demalys lageri ashyldy», - dedi oblys ákimi Berdibek Saparbaev.
Balabaqsha memlekettik-jekemenshik seriktestik aıasynda qoldanysqa berildi. Oblys ákiminiń baspasóz qyzmetiniń habarlaýynsha, munda aýtızm, tirek-qımyl júıesi, Daýn sındromy, aqyl-esi men ıntellektýaldy damýy buzylǵan balalar tárbıelenedi. Bul óńirdegi alǵashqy túzeý balabaqshasy. Munda basseın, massaj, fıtnes ortalyǵy, emdeý kabıneti bar. Mamandar aldyn ala oqytylyp, biliktiligin arttyrdy.
Aıta keteıik, oblysta 5 myńnan astam erekshe dıagnozben týǵan bala bar. Onyń 2 myńnan astamy mektepke deıingi jasta.
