Aqtóbede múmkindigi shekteýli balalardyń qolóner buıymdary aýktsıonda satyldy
Aqtóbe oblysy Shalqar aýdanynda qaıyrymdylyq aýktsıony ótti. Mektepterdegi pedogogıkalyq-psıhologııalyq týzetý kabınetiniń oqýshylary óz qolymen jasaǵan buıymdaryn satýǵa shyǵardy. Olar 70-ke jýyq buıym ázirlep, týyndylaryn aýdan turǵyndaryna usyndy. Qaıyrymdylyq aktsııasyna 30 oqýshy buıymdaryn ákeldi.
«Aýktsıonda ádemi tastarmen bezendirilgen áshekeıler, úkili sáýkele, sándi bilezikter, úı maketi, qorjyn, toqyma buıymdary, gıpsten jasalǵan músin, shaǵyn ámııandar, arqan jipten órilgen sebet jáne taǵy da basqa zattar satyldy. Biz árdaıym qoldap, kómektesýge daıynbyz. Balalardyń qoldan jasaǵan buıymdary óte sapaly ári tereń maǵynaǵa toly. Mysaly, ІІІ top múgedegi Islambek Nurtazın jeke úıdiń shaǵyn úlgisin jasaǵan. Men balanyń qurylys salasynyń jaqsy mamany bolatynyna senim bildiremin. Ózim sol úıdi satyp aldym», - dedi aýdan turǵyny Oral Aldabergenuly.
Balalar aýktsıonǵa úlken daıyndyqpen kelgen. Olar qolóner buıymdaryn jasaý úshin tynbaı izdenip, eńbek etti. Satylymnan túsken qarjy buıymdardy jasaǵan múmkindigi shekteýli balalarǵa berildi.
«Aýktsıon ótedi degen habarlamany estigen balam qýanyp, óz oıynda júrgen buıymyn daıyndaýǵa kiristi. Qyz balalarǵa arnalǵan toqyma buıymdaryn jáne bilezikterdi satylymǵa shyǵardyq. Balalarymyzdy nazardan tys qaldyrmaı, olardyń jasaǵan buıymdaryn satyp alǵan azamattarǵa alǵys aıtamyn», - dedi І top múgedegi Nurıslam Haırýdınovtyń anasy Jarqynaı Tileýbaeva.
Aıta keteıik, aýktsıon «Nur Otan» partııasynyń 20 jyldyǵy aıasynda jáne partııanyń «Kedergisiz keleshek» aktsııasymen ótti. Qazirgi kezde Shalqar aýdanynda 988 múmkindigi shekteýli adam turady. Onyń 74-i 18 jasqa tolmaǵan bala.
