Aqtóbede múmkindigi shekteýli adamdarǵa arnalǵan sport kesheni salynady
AQTÓBE. QazAqparat - Aqtóbe qalasynda múgedekterge arnalǵan sport kesheni salynady. Bul týraly múmkindigi shekteýli adamdarǵa arnalǵan sport klýbynyń dırektory Natalıa Sokolskaıa aıtty, dep habarlaıdy QazAqparat tilshisi.
Aqtóbede múmkindigi shekteýli jandardyń belsendiligi jyl ótken saıyn artyp keledi. Sportshylar ázirge balalar men jasóspirimder sport mektepteri men joǵary sport sheberleriniń kesheninde jattyǵý jasap, túrli jarystarǵa daıyndalyp júr. Bári aqysyz.
«Múmkindigi shekteýli sportshylarǵa arnalǵan sport keshenin aldymen «Nur Aqtóbe» yqshamaýdanyna salý josparlandy. Bul shaǵynaýdan múgedekter úshin qashyq ári tıimsiz boldy. Keıin joba ortalyqqa jaqyn «Batys-2» aýdanyna kóshirildi. Sport kesheni balalarǵa arnalǵan ońaltý ortalyǵynyń janyna salynady. Ortalyqqa 5 ga, sport keshenine 2 ga jer bólinip, jobalyq-smetalyq qujaty ázirlenip jatyr»,- dedi Aqtóbe oblystyq múmkindigi shekteýli adamdarǵa arnalǵan sport klýbynyń dırektory Natalıa Sokolskaıa.
Aıta keteıik, múmkindigi shekteýli jandar arasynda sporttyq jarystar jıi uıymdastyrylyp turady. Búgin halyqaralyq múgedekter kúnine oraı paýerlıftıngten, ústel tennısinen jarys ótti. Oblystyq chempıonatqa barlyǵy 50-den astam sportshy qatysty. Olardyń arasynda óz aıaǵymen júretinder, arbaǵa tańylǵandar bar. Bárin sport biriktirip, múmkindigi shekteýli jandardy «Nur Otan» partııasynyń Aqtóbe oblystyq fılıaly baǵaly syılyqpen, dıplommen marapattady.
«Múgedekter arasynda jarys jıi bolyp turady. Múmkindigi shekteýli jandardyń belsendiligi jyl ótken saıyn artyp keledi. Ústel tennısiniń sheberleri álem, Azııa chempıonattaryna qatysyp júr. Máselen, Aıdyn Aldabergen álem chempıonatynda 6 oryn, Andreı Akrýshko Vengrııada 3 oryn, parataekvandoǵa qatysqan Nysanbek Aıdarbekov Azııa birinshiliginde úshinshi oryn aldy. Júzý, paýerlıftıng, jeńil atletıka, voleıbol oıyndary jaqsy damyp keledi. Estý qabileti nashar adamdar shahmat, doıby, toǵyzqumalaq oınaıdy. Kúres te jaqsy damyǵan. Alda úlken jospar bar. Keler jyly múmkindigi shekteýli adamdarǵa arnalǵan sport kesheni salynady»,- dedi dene múmkindigi shekteýli adamdarǵa sport klýbynyń ádiskeri Aıbolat Bekbolatuly.
Jarysqa tek oblys ortalyǵynda turatyn múgedekter emes, aýdandardaǵy sportshylar da qatysty. Sporttyq saıysta basqosyp, bir-birimen tájirıbe almasatyn jandar respýblıkadan asyp, shetelde ótetin halyqaralyq, álemdik dodalarǵa qatysýdy maqsat etken.
«Jasym 50-ge kelip qaldy. Men úshin úıde otyryp, basymyzǵa túsken qıyndyqtar men kedergilerdi aıtý namysyma tıedi. Sondyqtan alǵa umtylyp, shaǵyn kásip bastadym, monshaqtan túrli qolóner buıymdaryn jasaımyn. Ári sportty serik ettim. Sońǵy jyldary oblystyq, respýblıkalyq jarystarǵa baryp júrmin. Ústel tennısinen sport sheberimin. Áli de sheberligimdi shyńdap, álemdik jarystarǵa qatysýdy josparlap júrmin. Sebebi sport jiger beredi, ómirge qushtarlyǵymyzdy arttyrady»,- dedi úshinshi top múgedegi Janat Tájekenova.
