Aqtóbede múmkindigi shekteýli adamdardy jumysqa ala almaǵan kompanııalar qorǵa aqsha bóledi
AQTÓBE. QazAqparat - Aqtóbe qalasynyń ákimi, oblystyq kásipodaq pen múgedekter qoǵamy úshjaqty memorandýmǵa qol qoıdy. Aldaǵy ýaqytta múmkindigi shekteýli azamattardy jumysqa almaǵan kompanııalar arnaıy qorǵa aqsha bóledi, dep habarlaıdy QazAqparat tilshisi.
Aqtóbe qalasynda ótken «Biz birgemiz» aktsııasy múmkindigi shekteýli azamattardy meılinshe kóp jumysqa ornalastyrýǵa baǵyttaldy. Búgin Aqtóbe qalasynyń ákimi Іlııas Ispanov, Aqtóbe oblystyq kásipodaq tóraǵasy Altynbek Ámirǵalıev jáne Aqtóbe oblystyq múgedekter qoǵamynyń ókili, oblys ákiminiń shtattan tys keńesshisi Quralaı Baımenova úshjaqty memorandýmǵa qol qoıdy.
«Memorandým aıasynda Aqtóbe qalasynda qor qurylady. Kompanııalar úsh paıyzdyq kvota bólip, múmkindigi shekteýli jandy jumyspen qamtýy kerek. Bul talap oryndalmasa jumys berýshi qorǵa aqsha bóledi. Al qorǵa jınalǵan qarjy arqyly múgedekterdiń jumys isteýine múmkindik beremiz. Eýropada bar tájirıbeni elimizde alǵash ret iske asyrǵymyz keledi. Sol kezde múgedekter óz kásibin ashyp, eńbekke aralasady»,- dedi Aqtóbe qalalyq jumyspen qamtý jáne áleýmettik baǵdarlamalar bóliminiń basshysy Neılá Bórtebaeva.
Buǵan deıin habarlaǵanymyzdaı, oblys ákimi Berdibek Saparbaev búgin 50 múmkindigi shekteýli janǵa jumysqa ornalasýǵa múmkindik beretin arnaıy joldama tapsyrdy. Olar ákimdikte, memlekettik mekemeler men kásiporyndarda jumys isteıdi.
