Aqtóbede Muqaǵalı Maqataev atyndaǵy orta mektep ashyldy
AQTÓBE. QazAqparat - Konstıtýtsııa kúni Aqtóbe qalasynda eki mektep paıdalanýǵa berildi, dep habarlaıdy QazAqparat tilshisi.
Aqtóbe qalasyndaǵy Qyzyljar aýylynda Muqaǵalı Maqataev atyndaǵy orta mektep ashyldy. Mekteptiń ashylýyna oblys jáne qala basshylyǵy, aýyl turǵyndary, oqýshylar jınaldy.
«Eldiń bolashaǵy, damýy balalarǵa baılanysty ekenin bári biledi. Balalarymyz, jastarymyz qazirgi zaman talabyna saı bilim alýy kerek. Sol tapsyrmany oryndaý maqsatynda jumys isteımiz. Qazir 26 mekteptiń qurylysy júrip jatyr. Onyń 15-i bıyl paıdalanýǵa berilse, 9-y Bilim kúnine deıin iske qosylady. Aıta ketetin bir jaıt, árbir ata-ana balanyń aldyndaǵy boryshyn umytpaýy kerek. Ustazdar da bala tárbıesine úlken úles qosady», - dedi oblys ákimi Berdibek Saparbaev.
Muqaǵalı Maqataev atyndaǵy orta mektep 300 balaǵa arnalǵan. Munda múgedek balalar úshin lıft jumys isteıdi. Sonymen qatar 200 adamǵa arnalǵan májilis zaly, tolyq jabdyqtalǵan sport zaly men pándik kabınetter bar. Ashana 100 orynǵa shaqtalǵan. Aqtóbe qalalyq bilim bóliminiń basshysy Aısulý Jaqsybevanyń aıtýynsha, mektep ashanasynda elektrondy karta paıdalanylady.
«Aqtóbe qalasynda úsh aýysymdy mektep máselesi sheshildi. Jańa oqý jylynda 7 mektep ashylyp otyr. Ári birneshe mektepke qosymsha ǵımarat salynýda», - dedi A. Jaqsybaeva.
Aıta keteıik, búgin sondaı-aq Jańaqonys aýylynda Sábıt Dónentaev atyndaǵy orta mektep ashyldy. 300 balaǵa arnalǵan mektep zamanaýı úlgide salynǵan.
