Aqtóbede múgedektigi bar adamdar jumysty qaıdan tabady
AQTÓBE.KAZINFORM – Aqtóbe qalasynda bıyl qoǵamdyq jumys ornyna qarjy bólinbedi. Múgedektigi bar adamdarǵa jumys usyný úshin mekemelerge kvota berildi.
Aqtóbe qalasy boıynsha bıyl 24 mekemege 37 kvota berildi. ıAǵnı jyl ishinde osy mekemelerdiń barlyǵy múgedektigi bar adamdardy jumysqa qabyldaýy tıis. Alaıda onyń bári talapty oryndaı bermeıdi.
- Byltyr 20 mekeme 41 adamdy jumysqa ornalastyrýy tıis boldy. Tek 35 adam kvota boıynsha turaqty eńbekke aralasty. Múgedektigi bar adamdardyń keıbiri joldama alyp, barmaı qalǵan. Olar jumystyń aýyrlyǵyn, jalaqynyń az ekenin, úı men jumys arasyndaǵy alshaqtyqty aıtady. Keıde adamnyń ózi mekeme usynǵan jumys talaptaryna saı bolmaı shyǵady. Máselen Aqtóbe joǵary gýmanıtarlyq kolledjine birneshe adam joldama aldy. Alaıda birde bireýi qabyldanbaǵan. Sonymen birge №16 orta mektep muǵaliminiń kómekshisi qyzmetine joldama alǵan múgedektigi bar azamat jumystan óz erkimen bas tartty. №78 orta mektepke joldamamen barǵan azamat ta bir kúnnen soń jumysqa shyqpaıtynyn aıtty. Sóıtip byltyr Aqtóbe qalasynyń kórsetkishi 85,4% boldy. Múgedektigi bar adamdy jumyspen qamtymaıtyn mekeme aıyppul tóleıdi. Bul jumystyń atqarylýyn prokýratýra baqylap otyrady, - dedi Aqtóbe qalasy «Mansap» ortalyǵynyń dırektory Aına Myrzataeva.
Sonymen birge «Mansap» ortalyǵy Aqtóbe oblystyq eńbek ınspektsııasy departamentine kvota boıynsha bos jumys oryndaryn usynbaıtyn mekemeler týraly habar berip otyrady.
Múgedektigi bar adamdardy jumyspen qamtýdyń taǵy bir joly – bos jumys oryndary jármeńkesi. Búgin 36 bos jumys orny usynyldy. Jármeńke múgedektigi bar 25 adam qatysty. Tek jeteýi turaqty bos jumys oryndaryna joldama aldy. Qalǵan kelýshilerge memlekettik qoldaý tetikteri jáne qysqa merzimdi kásiptik oqytý jaıly aıtyldy.
- Qazirgi kezde qalada múgedektigi bar 2 myńǵa jýyq eresek bar. Onyń myńǵa jýyǵy úshinshi top, ıaǵnı jumysqa jaramdy. Búginde «Mansap» ortalyǵyna jolyqqan 88 adam turaqty jumysqa baǵyttaldy. Byltyr 400-den astamy jumysqa ornalasty. Bizde mal dárigeri, esepshi, operator, zerthanashy mamandardyń jumysyn suraıdy. Sonymen birge mektepke jumysqa turǵysy keledi. Al bilim ordasyna qyzmetke qabyldaý úshin talapqa saı konkýrstan ótýi tıis. Bir qıyny bıyl qoǵamdyq jumysqa ornalastyra almaı otyrmyz. Sebebi qarjy bólinbedi. Al múgedektigi bar adamdardyń kóbi osy qoǵamdyq jumys baǵytyn tańdaıdy, - dedi Aına Myrzataeva.
Aqtóbe oblystyq jumyspen qamtý jáne áleýmettik baǵdarlamalar basqarmasynyń basshysy Lázzat Orazbaevanyń aıtýynsha, Eńbek jáne halyqty áleýmettik qorǵaý mınıstrligi bıyl tek aýdandarǵa qarjy bóldi. Al oblys ortalyqtaryndaǵy qoǵamdyq jumys oryndaryn uıymdastyrý úshin qarjy jergilikti bıýdjetten qarastyrylýy tıis.
- Byltyr qalada 300-den astam adam qoǵamdyq jumysqa tartyldy. Bıyl naýryz aıynda eń bolmaǵanda 120 qoǵamdyq jumys ornyn uıymdastyrýǵa qarjy bólýdi oblystan suraǵan edik. Ázirge qoldaý tappady. Aqtóbe qalasy ákimdigi qala bıýdjetinen de aqsha bóle alady. Alaıda olar da qarjy qarastyrmady. Bıylǵy ózgeris týraly aldyn ala aıtylyp, habar berildi, - dedi Lázzat Orazbaeva.
Aıta keteıik, Shymkentte jyl basynan beri múgedektigi bar 156 azamat jumyspen qamtý sharalaryna tartylyp, onyń 61-i turaqty jumysqa ornalasty.
