Aqtóbede múgedekterge yńǵaıly avtobýstar kótergishterin alyp tastaǵan
Elbasy Nursultan Nazarbaev múgedekterdiń kedergisiz júrýi úshin túrli baǵyttaǵy jumystardy jandandyrýdy tapsyrǵan bolatyn. Osyǵan sáıkes, ótken jyldyń maýsym aıynda Aqtóbe ákimdigi arbada otyrǵandarǵa yńǵaıly kótergishi bar 70 avtobýsty nesıege satyp alǵan edi.
Al búgin «Nur Otan» partııasynyń oblystyq fılıaly «Kedergisiz keleshek» jobasy aıasynda qoǵamdyq baqylaý júrgizip, birneshe olqylyqty anyqtady. Múgedek jandar qoǵamdyq kólikke mine almady, dybys zoraıtqysh iske qosylmady, elektrondy aqparattyq taqta da bolmaı shyqty.
«Tek áleýmettik nysandar, turǵyn úı ǵana emes, qoǵamdyq kólik te arbada otyrǵandarǵa qoljetimdi bolýy tıis. Jazda tekserip, avtobýsqa minýge 2 mınýt qajet ekenin bildim. Al búgin qoǵamdyq baqylaý tobymen shyǵyp, bárin alyp tastaǵanyn kórdik. Menińshe, tasymaldaýshylar biz sekildi adamdarǵa ýaqyt shyǵyndaǵysy kelmeıdi», - dedi qoǵamdyq baqylaý tobynyń múshesi, I-top múgedegi Shahan Joldasbaev.
Baqylaýshy top arnaıy jasaqtalǵan avtobýstardyń kótergishterin keri qaıtarý kerek dep esepteıdi.
«Tasymaldaýshylar mehanıkalyq kótergishke aýystyrý úshin bárin alyp tastaǵanyn aıtty. Biraq, bul jaı ǵana jaýapkershilikten qashý, Elbasynyń óz Joldaýlarynda berip júrgen tapsyrmalaryn oryndaýdan bas tartý dep túsinemiz. Kemshilikter boıynsha qalalyq ákimdikke tekserý qorytyndysy beriledi. Ákimdik sheshim qabyldaýy tıis», - dedi «Nur Otan» partııasynyń oblystyq fılıaly saıası jumystar bóliminiń meńgerýshisi Aqylbek Sahıev.
Aıta keteıik, baqylaý toby Aqtóbe qalasyndaǵy alǵashqy jerústi jolynyń múgedekterge qoljetimdiligin de tekserdi. Mundaǵy lıft qulyptaýly turdy. Al kórsetilgen baılanys telefonyna habarlasqan kezde, tıisti adamdar 15 mınýtta jetip, ony kiltpen ashyp beretinin aıtqan. Biraq baqylaý toby 20 mınýt kútip, jerústi jolyna kóterile almaı ketti.
