Aqtóbede muǵalimderge tórt aıdan beri jalaqy bermegen mektep ákimshiligine aıyppul salyndy
AQTÓBE. KAZINFORM — «Bilim», «Smart bilim» mektebiniń ákimshiligi 300 myń teńgege jýyq aıyppul arqalady. Al muǵalimder áli de jalaqy ala almaı otyr.
Aqtóbedegi jeke mektep muǵalimderi búgin taǵy da aımaq jýrnalısterin shaqyryp, aryz-shaǵymyn aıtty. Olardyń kóbi nesıeni ýaqytyly óteı almaı, «qara tizimge» enip ketken. Sonymen birge tanys-tamyrlaryna da qaryz.
— Men mektep ashylǵannan beri jumys isteımin. Tamyzdan bastap, tórt aıdan beri jalaqy almadyq. Sabaqqa kedergi keltirmedik, bári óz ýaqytymen ótip jatyr. Biraq jalaqy joq. Ákimnen, oblys ákiminen, oqý bóliminen kómek suraımyz. Muǵalimderdiń bári qaryz alǵan jáne nesıeleri bar. Tipti qazir kóbi «qara tizimge» kirip ketti. Ipoteka, basqa da kredıt bar. Bizge 10 kúnde tólenedi dedi. Dál osylaı 10 kún saıyn aldaǵy 10 kúnde dep ýáde berip keledi. Óte kóp muǵalim jumystan shyǵýǵa májbúr boldy. Áli de shyǵyp jatyr. 500 muǵalim bolsa, 100-150 muǵalim shyqty. Tórt aı boıy ne kıip, ne iship jatyr? Eshkim alańdamaıdy, — dedi mektep muǵalimi Gúlmıra Júsipova.
Dál osy mekteptiń muǵalimi Nurgúl Tóleýbaeva da banktiń eshqaısysy da keshirimmen qaramaıtynyn aıtty. Al dekrettik demalysqa shyǵatyn muǵalimder arnaıy tólemsiz qaıda bararyn bilmeıdi. Degenmen muǵalimder eńbek ınspektsııasy departamentine baryp shaǵym túsirmegen. Inspektsııa máseleni áleýmettik jeli arqyly ǵana kórip otyr. Ákimshilik quqyqbuzýshylyq týraly kodekstiń 87-1-baby boıynsha aıyppul da saldy.
— Aqtóbe qalasy prokýratýrasynan usynys kelip tústi. Sol usynys boıynsha zańdy tulǵaǵa zańmen belgilengen merzimde eńbekaqyny tólemegeni úshin shamamen 300 myń teńge aıyppul salyndy. Eger qyzmetkerler «eńbek zańnamasy buzyldy» dep departamentke shaǵym túsirse, tekserý júrgiziledi. Keshiktirse ár kúnge ósimaqy tóleýi tıis, — dedi Aqtóbe oblystyq eńbek ınspektsııasy departamentiniń bólim basshysy Aqylbek Zeınollauly.
Mektep ákimshiligi ótemaqyǵa aqsha múlde qarastyrylmaǵanyn aıtty.
— Qarjylandyrmaý máselesi sońǵy úsh jylda kezdesip tur. Alǵashynda Ǵylym jáne bilim mınıstrligi, Oqý aǵartý mınıstrligi boldy. Qarjylandyrýdy Qarjy mınıstrligine aýdaryp, jańadan platforma oılap tapty. Ýaqtyly jalaqy tólemegen soń bizge de aıyppul saldy. Ustazdarǵa ótemaqy tóleý týraly másele kóterilip jatyr. Bilim basqarmasymen, eńbek ınspektsııasymen birge sheshpesek, ondaı qarajat bizdiń taraptan qarastyrylmaǵan. Mektep balalarǵa tolyǵymen aqysyz bilim bergendikten bizdiń esepshotymyzda ondaı qarajat joq, — dedi «Bilim» jáne «Smart bilim» mektepteriniń dırektory Aıgúl Aryzǵazıeva.
Aıta keteıik, ár balaǵa jylyna 570 myń teńge aýdarylady. Aqtóbe oblysy boıynsha barlyǵy 29 jeke mektep memlekettik tapsyrys alady. Onyń ishinde «Bilim» jáne «Smart bilim» mektebinde 8 myńnan astam oqýshy oqıdy. Onda 579 pedagog tirkelgen.
— Bıyl mamyr aıynan bastap qarjylandyrý jergilikti bıýdjetke berildi. Qazir mınıstrlik jańa mehanızmdi iske qosyp, derekter «E-Qazyna» platformasyna engizilip jatyr. Búgin oqýshylar sany túgel engizilip, kelisimshart aıasynda qarjylandyrý júredi. Jergilikti bıýdjetten 4 mlrd teńge qarastyrylyp otyr. Onyń 1,4 mlrd teńgesi osy «Smart bilim» mektebine tıesili, — dedi Aqtóbe oblystyq bilim basqarmasy basshysynyń orynbasary Aqkenje Tyndybaeva.
Buǵan deıin habarlaǵanymyzdaı, Aqtóbede jeke mektep muǵalimderi 4 aıdan beri jalaqy ala almaı otyr. Eki jeke mektepte 741 qyzmetker bar.