Aqtóbede muǵalim men oqýshylar astan ýlanyp, aýrýhanaǵa tústi
AQTÓBE. QazAqparat - Aqtóbede №9 mektep-gımnazııasynyń oqýshylary astan ýlanyp qaldy, dep habarlaıdy QazAqparat tilshisi.
Mektep-gımnazııanyń ashanasynda tamaq ishken oqýshylar 19 sáýir kúni keshkilik aýrýhanaǵa túse bastaǵan. 21 adamnan ishek ınfektsııasy anyqtaldy. Olardyń 20-sy - oqýshy, bireýi - muǵalim.
«Qazirgi kezde 2 naýqas aýrýhanada tıisti em alyp jatyr. Qalǵan 19 adamǵa alǵashqy medıtsınalyq kómek berilip, olar ata-analardyń qalaýymen ambýlatorlyq emdi qabyldaýdy úılerinde jalǵastyrady. Naýqastardyń jaǵdaıy qanaǵattanarlyq. Barlyǵy dárigerlerdiń baqylaýyna alyndy. Epıdemıologııalyq anyqtaý kezinde bári de mektep ashanasynda tamaq ishkeni anyqtaldy. Aqtóbe qalalyq Qoǵamdyq densaýlyq saqtaý basqarmasy № 9 mektep-gımnazııasynyń ashanasyna jospardan tys zerthanalyq tekserý júrgizdi.Tekserý barysynda ashanada jýylǵan ydystardyń durys keptirilmeıtini, ydys keptiretin arnaıy qurylǵynyń, shıki taǵamdardy saqtaıtyn tońazytqysh ishindegi termometrdiń joqtyǵy, shıki taýyq eti jáne tartylǵan balyq óniminiń sapasyn rastaıtyn qujattardyń bolmaýy sekildi talaptardyń buzylýy anyqtaldy», - dedi Aqtóbe qalalyq Qoǵamdyq densaýlyq saqtaý basqarmasy basshysynyń orynbasary Aısáýle Oralbaeva.
Sonymen qatar tekserý barysynda ashanany jalǵa alyp otyrǵan jeke kásipker A.Naýryzbaevtyń sanıtarlyq-epıdemıologııalyq qorytyndy almaı jumys istegeni anyqtaldy. Osy derek boıynsha № 9 mektep-gımnazııasynyń dırektoryna tártiptik shara qoldaný úshin Aqtóbe qalasy ákimine, qalalyq bilim bólimine hat joldanady. Qazirgi kúni ashana jumysy toqtatyldy. Epıdemıologııalyq tekserý jalǵasyp jatyr.
