Aqtóbede muǵalim men oqýshy ýlanǵan astan ishek taıaqshasy tabyldy
AQTÓBE. QazAqparat - Aqtóbede mektep oqýshylary men muǵalimniń qandaı astan ýlanǵany belgili boldy, dep habarlaıdy QazAqparat tilshisi.
Buǵan deıin habarlaǵanymyzdaı, mektep ashanasynan aýqattanǵan oqýshylar men muǵalim ýlanyp, aýrýhanaǵa túsken bolatyn.
Aqtóbe oblystyq qoǵamdyq densaýlyq saqtaý departamenti basshysynyń orynbasary Gúlbaný Dáýletova búgin osy oqıǵaǵa qatysty júrgizilgen tekserý qorytyndysy týraly aıtty.
«19-24 sáýir aralyǵynda №9 mektep-gımnazııasynda astan ýlanýdyń 26 deregi tirkeldi. Barlyǵy 22 naýqasqa astan ýlaný dıagnozy qoıyldy. Al ózge adamdardyń buryn da asqazany aýyrǵan eken. Osy jaǵdaıǵa baılanysty qoǵamdyq densaýlyq saqtaý departamentiniń qalalyq basqarmasy mektep ashanasyna tekserý júrgizip, birneshe synama aldy. Tekserý kezinde 3-sáýirden bastap kásipkerdiń sanıtarlyq-epıdemıologııalyq qorytyndy almaı jumys istegeni anyqtaldy. Sonymen qatar taýyq eti men tartylǵan balyq etine sapa men qaýipsizdik belgisin anyqtaıtyn qujat joq bolyp shyqty. Tońazytqyshta termometr joq, ydys-aıaq keptiretin qurylǵy jumys isten shyqqan. Bir jumysshynyń medıtsınalyq kitapshasy bolmady», - dedi Aqtóbe oblystyq qoǵamdyq densaýlyq saqtaý departamenti basshysynyń orynbasary Gúlbaný Dáýletova.
Barlyǵy 30 synama alynyp, onyń altaýynan ishek taıaqshasy, ekeýinen S.aureus, ıaǵnı, stafılokokk anyqtaldy. Stafılokokk botqadan, al ishek taıaqshasy taýyq etinen jasalǵan úı sorpasy men irimshik qosylǵan taýyq etinen shyqty. Ashanada 8 adam jumys istese, onyń ekeýinde stafılokokk tirkeldi.
«Ákimshilik quqyqbuzýshylyq týraly is tirkelip, 2 materıal sotqa jiberildi. Aqtóbe oblysy, qala ákimdigine, prokýratýra hat joldandy. Aqtóbe oblystyq bilim basqarmasy men qalalyq bilim bóliminen qujatsyz jumys isteýge ruqsat bergeni úshin dırektorǵa shara qoldaný suraldy», - Gúlbaný Dáýletova.
