Aqtóbede muǵalim men oqýshy sot zalynda kezdesti

№10 orta mekteptegi oqıǵa 2016 jyldyń 17 qyrkúıegi kúni tirkelgen. 3-synypta oqıtyn qyz bala sol kúni matematıka sabaǵynda sońǵy partada otyrǵan.

«Sol kúni sońǵy partada otyrdym. Ornymnan qozǵalyp, sómkemdi qarap jatqan kezde apaı «qozǵala berme» dep basymnan urdy. Ájethanaǵa suranyp, anama telefon shaldym. Ol apaıǵa habarlasty. Synypqa kelgen soń maǵan apaı: «Basyń aýyryp tur ma?» dep, balalardyń aldynda uıatqa qaldyrdy. Apaı meni 2-synyptan bastap urdy. Meni janyna jaqyndatpaıdy, maǵan nazar aýdarmaıdy», - dedi sot otyrysynda 3-synyp oqýshysy.

Búgingi sot otyrysyna №10 orta mekteptiń psıhology Raýan Qýandyqova, qazirgi klass jetekshisi Mánshúk Batyrǵalıeva shaqyryldy. Eki ustaz da áriptesteri Mádına Jumabaevany bilikti maman retinde tanıtyndaryn jetkizdi. Al 3-synyp oqýshysy tynyshsyz, keıde ustazdyń ashýyna tıip, kóńilin qaldyratyn qylyqtar jasaıtynyn aıtty.

«Oqýshy 17 qyrkúıekte ketken soń sabaqqa 19 qazan kúni keldi. Birinshi sabaqta eshteńe baıqalmady. Al «Ózin-ózi taný» páninde aýyryp otyrmyn dep, medbıkege qaraldy. Kózin ashpaı jatqan soń jedel járdem shaqyryp, anasy Ásem keldi. Ol úıine alyp ketti. Qazir ol basym aýyrady dep aıtyp júrgen joq. Men 7 pánnen sabaq beremin. Balaǵa erekshe qaraımyn. Qańtar aıynda 6 ret, aqpan aıynda 5 ret ekinshi sabaqqa keldi», - dedi synyp jetekshisi Mánshúk Batyrǵalıeva.

Aıta keteıik, sot otyrysy kezinde klass jetekshi M.Batyrǵalıeva qubylmaly minezi bar oqýshy kez kelgen jaǵdaı boıynsha anasy Ásemge habarlap, shaǵym aıtyp otyratynyn málim etti. «Búkil mektepte qolynan ustap júremin. Tipti ashanaǵa birge baramyz. Meni de isti ete me dep qorqamyn», - dedi M.Batyrǵalıeva.

Sot otyrysy jalǵasyp jatyr. Aldaǵy ýaqytta psıhologtar men sot-medıtsınalyq saraptama qyzmetkerleri tyńdalady.

Esterińizge sala keteıik, osyǵan deıin isti bolǵan ustazdy ata-analar jaqtap otyrǵany týraly habarlaǵan bolatynbyz.