Aqtóbede mototsıkl rýline ıe bola almaǵan jasóspirim kóz jumdy
Aqtóbe oblystyq polıtsııa departamenti taǵy da eskertý jasady. Jol-kólik oqıǵasyn boldyrmaý úshin erejeni qatań saqtaý kerek.
«Kámelet jasqa tolmaǵan aqtóbóbelik memlekettik tirkeý nómiri joq «LT-200» mototsıklimen Hromtaý aýdanynyń Tasótkel aýyly baǵytynda kele jatyp, rýldi basqara almaı qaldy. Ol oń jaqqa aýdarylyp ketken. Tekserý kezinde qajetti júrgizýshi kýáligi bolmaǵany anyqtaldy. Jol-kólik oqıǵasy saldarynan jasóspirim alǵan jaraqatynan oqıǵa ornynda kóz jumdy. Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha sotqa deıingi tergeý bastaldy», - dedi oblystyq PD baspasóz qyzmeti.
Eske salsaq, Aqtóbede jol-kólik oqıǵasy jıilep ketti. Samara-Shymkent tasjolynda 6 adam kóz jumdy .
Al Aqtóbe-Atyraý tasjolynda tórt adam mert boldy. Temir qalasynan Keńqııaq aýyly baǵytynda kele jatqan VAZ-2113 avtokóliginiń 26 jastaǵy júrgizýshisi qarsy qozǵalysqa arnalǵan jolaqqa shyǵyp ketip, Muǵaljar aýdanynyń 50 jastaǵy turǵynynyń basqarýyndaǵy KamAZ kóligimen soqtyǵysqan. Jol-kólik oqıǵasy saldarynan VAZ-2113 avtokóliginiń júrgizýshisi men úsh jolaýshysy alǵan jaraqattarynan oqıǵa ornynda kóz jumdy . Kóp uzamaı osy aýdannyń ákeli-balaly turǵyny jol apatynda mert boldy . GAZel avtokóliginiń júrgizýshisi Aqtóbe qalasy baǵytyndaǵy jolda qarsy jolaqqa shyǵyp ketip, Temir aýdanyna bara jatqan «Toyota Camry» avtokóligimen soqtyǵysqan.
