Aqtóbede monıtorıng toby emdeý mekemelerinde baqylaý júrgizdi
AQTÓBE. QazAqparat – «Aqtóbe – adaldyq alańy» jobalyq keńsesiniń ókilderi qaladaǵy aýrýhanalarǵa, emhanalar men dárihanalarǵa monıtorıng júrgizdi, dep habarlaıdy QazAqparat tilshisi.
Monıtorıng toby pandemııanyń ekinshi tolqynyna daıyndyq jumysyn pysyqtady. Jobalyq keńse basshysy Janbolat Turtaev Qarǵaly qalalyq aýrýhanasy men №2 qalalyq emhanada monıtorıng júrgizdi. Jumys barysynda aýrýhanalardyń sanıtarlyq talaptardy saqtaýyna, Damymed baǵdarlamasy arqyly tirkeý jáne halyqty qabyldaý, sonymen qatar aýrýhana ishindegi dárihananyń jaǵdaıymen tanysyp, dári-dármekterdiń qoryna baqylaý júrgizdi.
Atalmysh aýrýhanalardyń bas dárigerleriniń aıtýy boıynsha qazirgi tańda pandemııaǵa baılanysty jaǵdaı turaqtalǵan. Aýrýhanalar kúndelikti jumystaryn qalypty atqaryp keledi. Dári – dármek qory jáne sanıtarlyq talaptarǵa arnalǵan qural-jabdyq jetkilikti. ıAǵnı, pandemııanyń ekinshi tolqyny jaǵdaıynda aýrýhanalar daıyn. Sonymen birge jobalyq keńse sarapshylary Turar Kartamuly jáne Zúlfııa Nabıýlına Aqtóbe oblystyq ınfektsııalyq aýrýhanasynyń jaǵdaıymen tanysty. Monıtorıng jumysy barysynda aýrýhananyń sanıtarlyq talaptardy saqtamaıtyndyǵy anyqtaldy.
«Kez kelgen mekemeniń kireberisinde syrttan kirgen adamdardyń qyzýyn ólsheıtin jáne qoldy dızınfektsııalaýshy mamandar bolý qajet. Ókinishke qaraı aýrýhanada ondaı mamandar bolǵan joq. Sonymen qatar dári – dármekterdi saqtaıtyn qoımanyń temperatýrasy belgilengen normada emes. Monıtorıng jumystarynyń nátıjesi boıynsha tıisti organdarǵa atalmysh kemshilikterdi joıý týraly usynystar beriletin bolady», - dedi jobalyq keńse sarapshysy Zúlfııa Nabıýlına.
