Aqtóbede myńnan astam azamat áskerge shaqyrylady

AQTÓBE. KAZINFORM — Kóktemgi áskerge shaqyrý naýqany naýryz aıynda bastalady. 18-27 jas aralyǵyndaǵy jas jigitter elimizdiń birneshe óńirine jiberiledi. 

Aqtóbe oblysynda qazir 18-27 jas aralyǵyndaǵy jas jigitterge shaqyrý jiberilip jatyr. Habarlama alǵan er azamattar medıtsınalyq tekserýden óteýi tıis. Arnaıy bilim berý, joǵary oqý oryndarynyń stýdentteri anyqtama tapsyrsa, densaýlyǵyna baılanysty em alyp júrgender de ózi jaıly habarlaýy kerek.

— 1 naýryz ben 30 maýsym aralyǵynda merzimdi áskerı qyzmetke shamamen 1200 azamatty shaqyrý josparlanyp otyr. Іrikteýden ótkenderi QR Qarýly Kúshteri, Ulttyq ulany, Ulttyq qaýipsizdik komıtetiniń Shekara qyzmeti, Tótenshe jaǵdaılar mınıstrligi jáne Memlekettik kúzet qyzmetiniń qataryn tolyqtyrady. Shaqyrylyp, biraq kelmegen jaǵdaıda ishki ister organdary jetkizýdi qamtamasyz etedi. Áskerı qyzmetten jaltarý ákimshilik jáne qylmystyq jazaǵa ákep soǵady. Qylmystyq kodekstiń 387-babyna sáıkes aıyppul nemese 1 jylǵa deıingi merzimge bas bostandyǵyn shekteý, bas bostandyǵynan aıyrý jazasy qarastyrylǵan, — dedi Aqtóbe oblystyq qorǵanys isteri jónindegi departament bastyǵy Ardaq Qumarov.

Departamenttiń málimetine súıensek, óńir jospardy tolyǵymen oryndap otyr. Áskerden jaltaryp júrgender joqtyń qasy.

Aıta keteıik, byltyr Aqtóbe oblysy boıynsha 112 áskerı qyzmetshi «Sarbaz» jobasy aıasynda bilim berý granttaryna ıe boldy. Buǵan deıin habarlaǵanymyzdaı, Aqtóbede qorǵanys isteri jónindegi departament bastyǵy taǵaıyndaldy.