Aqtóbede myńǵa jýyq mal óleksesine 144 mln teńgeden astam ótemaqy berildi

AQTÓBE. KAZINFORM – Aqtóbe oblysy boıynsha 909 bas mal úshin ıelerine 144,3 mln teńge ótemaqy berildi. Arnaıy komıssııa áli de jumysyn jalǵastyryp jatyr.

Aqtóbe oblysy boıynsha búginge deıin 3232 bas mal shyǵyny bar dep eseptelip otyr. Búginde mal ólekseleri túgel joıyldy. 

— Búgingi kúni 909 bas malǵa 144,3 mln teńge tólendi. Tasqyn saldaryn joıý maqsatynda qurylǵan arnaıy komıssııa áli de jumystardy jalǵastyrady. Shyǵyndy esepteýmen qatar óteý de qolǵa alynǵan. Aıta keteıik, sý tasqyny kezinde qyrylǵan mal ótemaqysyn tóleýdiń algorıtmi bar. Ol úshin óleksesi, syrǵasy bolýy kerek ári aýyl sharýashylyǵy bazasynda tirkelgeni rastalady. Statıstıka departamentiniń aýdandyq fılıal ókilderi maldyń jas ereksheligine baılanysty naryqtyq baǵany aıtady. Sol derekke sáıkes maldyń ótemaqysy anyqtalady. Aýdandaǵy tótenshe jaǵdaılardyń aldyn alý jáne olardy joıý komıssııasy akti jasap, sheshim shyǵarǵan soń qarjy aýdarylady, — dep habarlady Aqtóbe oblysy ákiminiń baspasóz qyzmeti.

Aıta keteıik, mal óleksesin órteý úshin Aqtóbege Astanadan ınsınerator ákelindi.

Jergilikti ákimdik shyǵyn shamamen 2,2 mlrd teńge bolady dep eseptedi.