Aqtóbede mıneraldy sý shyǵaratyn óndiris orny qaıta iske qosyldy
AQTÓBE. QazAqparat -Aqtóbeniń Shalqar aýdanynda mıneraldy sý qaıta óndirile bastady. Uzaq jyldar boıy toqtap turǵan óndiris ornyn iske qosýǵa 800 mıllıon teńgege jýyq ınvestıtsııa salyndy, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbede «Shalqar» mıneraldy sýy shyǵaryla bastady. «Shyraıly Shalqarym» forýmyna arnaıy shaqyrylǵan neırohırýrg Serik Aqsholaqov lentasyn qıyp, sáttilik tiledi.
«Memleket basshysy Nursultan Nazarbaevtyń saıasaty kásipkerlikti damytýǵa baǵyttalǵan. Prezıdent tapsyrmasyna sáıkes bizdiń oblysta kásipkerlikti damytý, sonyń ishinde turyp qalǵan kásiporyndardy qaıta iske qosý úshin birqatar jumys atqarylyp jatyr. Shalqar mıneraldy sýy óz kezeńinde barlyq Keńes odaǵyna belgili boldy. Kásiporyn obektıvti sebepterge baılanysty kóptegen jyldar boıy jumys istemedi. Búgin ol qaıtadan iske qosyldy. Zaýyt aımaqtyń ekonomıkalyq damýyna yqpal etedi jáne onyń ónimderi bizdiń elde ǵana emes, sondaı-aq kórshi elderde suranysqa ıe bolady dep senemin», - oblys ákimi dedi Berdibek Saparbaev.
Aqtóbe oblysy ákiminiń baspasóz qyzmetiniń habarlaýynsha, sý qory ótken ǵasyrdyń 50 jyldary anyqtaldy. 1961 jyly qalada mıneraldy sý quıatyn shaǵyn tseh ashyldy, al 1979 jyly ol qalpyna keltirilip, jańa zaýyt salyndy. Emdik-ashanalyq mıneraldy sý Keńes odaǵynyń barlyq dárihanasynda satylǵan. Al 90-jyldardan bastap zaýyt toqtap qaldy.
«Jabdyqtar Italııadan jetkizildi. Sýdyń sapasyn, quramyn, paıdaly elementterin saqtap, satýǵa shyǵaramyz. Sýdy eksporttaý josparda bar. Aldaǵy ýaqytta halyqaralyq sertıfıkattar alamyz», - dedi óndiris ornynyń bas tehnologi Roza Halyqova. Qazirgi kezde mıneraldy sý sharýashylyǵynda 40 adam turaqty jumys istep júr.
