Aqtóbedegi meıramhanada astan ýlanǵandar emin aıaqtady
AQTÓBE. KAZINFORM – Aqtóbede meıramhanada astan ýlanǵandardyń bári aýrýhanadan shyǵaryldy. Qazir tergeý jalǵasyp jatyr.
Aqtóbe oblystyq densaýlyq saqtaý basqarmasynyń habalaýynsha, Qandyaǵash pen Aqtóbe qalasynda em qabyldaǵan naýqastyń bári óz úıine oraldy. Al polıtsııa tergeýdi jalǵastyryp jatyr.
— Aqtóbe oblystyq sanıtarııalyq-epedemılogııalyq baqylaý departamentinen saraptama qorytyndysyn kútip otyrmyz. Tergeý jalǵasyp jatyr, — dep habarlady Aqtóbe oblystyq polıtsııa departamentiniń baspasóz qyzmeti.
Aqtóbe oblystyq sanıtarııalyq-epıdemıologııalyq baqylaý departamenti basshysynyń orynbasary Janserik Kýlmanovtyń habarlaýynsha, zertteý qorytyndysy polıtsııaǵa joldandy.
- Meıramhanada júrgizilgen sanıtarııalyq-epıdemıologııalyq tekserý barysynda sanıtarııalyq-epıdemıologııalyq talaptardyń óreskel buzýshylyqtary anyqtaldy. Atap aıtqanda, taǵam ónimderin daıyndaý jáne saqtaý tehnologııalyq úderisteri buzylǵan, qyzmetkerler jeke bas gıgıenasy talaptaryn saqtamaǵan ári mindetti medıtsınalyq tekserýden ótpeı jumys istegen. Zerthanalyq zertteýlerdiń nátıjeleri boıynsha taǵam ónimderiniń synamalarynan ishek ınfektsııalarynyń qozdyrǵyshtary, sondaı-aq patogendi jáne shartty-patogendi mıkroflora anyqtaldy. Atalǵan fakti boıynsha materıaldar quqyq qorǵaý organdaryna joldandy. Muǵaljar aýdandyq polıtsııa bólimi Qylmystyq kodekstiń 304-babynyń 1-bóligi boıynsha sotqa deıingi tergep-tekserýdi bastady,- dedi Janserik Kýlmanov.
Jalpy Muǵaljar aýdandyq sanıtarııalyq-epıdemıologııalyq baqylaý basqarmasyna barlyǵy 188 shuǵyl habarlama túsken. Astan ýlanǵandardyń 15-i bala. Olarǵa ortasha aýyr dárejede túsip, emdeldi.
Eske salaıyq, 19 maýsymnan bastap Muǵaljar aýdandyq aýrýhanasy men oblystyq klınıkalyq juqpaly aýrýlar aýrýhanasyna ishek ınfektsııasynyń belgilerimen 102 naýqas medıtsınalyq kómekke júginip, aýrýhanaǵa jatqyzyldy.
Jappaı astan ýlaný faktisine qatysty QR Qylmystyq kodeksiniń 304-baby («Sanıtarııalyq qaǵıdalardy nemese gıgıenalyq normatıvterdi buzý») belgilerimen sotqa deıingi tergep-tekserý bastaldy.
Muǵaljar aýdandyq sanıtarııalyq-epıdemıologııalyq baqylaý basqarmasy qoǵamdyq tamaqtaný nysanynyń jumysyn ýaqytsha toqtatty.
