Aqtóbede meshittiń seıfinen sadaqadan jınalǵan aqsha urlandy

AQTÓBE. QazAqparat – Aqtóbede belgisiz bireý meshittegi seıfke urlyqqa túsip, sadaqadan jınalǵan aqshany alyp ketken. Polıtsııa kúdiktini ustady, dep habarlaıdy QazAqparat tilshisi.

Polıtsııaǵa Muǵaljar aýdany Aqkemer aýylynyń meshitindegi seıftiń qulpy buzylyp, sadaqadan jınalǵan aqshanyń urlanǵany týraly habarlama tústi. Jergilikti polıtsııa bóliminiń qyzmetkerleri jedel izdestirý ótkizip, kórshi aýyldyń 34 jastaǵy turǵynyn anyqtap, ustady.

«Atalǵan derek negizinde Qylmystyq kodekstiń «Urlyq» baby boıynsha sotqa deıingi tergeý bastaldy. Osy baptyń sanktsııasy múlkin tárkileı otyryp, 5 jylǵa deıingi merzimge bas bostandyǵynan aıyrý túrindegi jazany kózdeıdi», - dedi oblystyq PD baspasóz qyzmetiniń jetekshisi Erbolat Sarqulov.