Aqtóbede mert bolǵan 52 ózbekstandyqtyń rýhyna 52 jemis aǵashy otyrǵyzyldy
ASTANA. QazAqparat - Qazaqstandaǵy Ózbekstan Respýblıkasynyń Elshiligi men astanalyq «Altyn Orda» bıznes-klýby Aqtóbe apatynda mert bolǵan 52 ózbekstandyqtyń rýhyna baǵyshtap, 52 jemis aǵashyn otyrǵyzdy, dep habarlaıdy QazAqparat tilshisi.
Shara aıasynda elordanyń jańa «Botanıkalyq baǵyna» 42 alma jáne 10 sheten aǵashtary otyrǵyzyldy.
«Ózbekstan - elimizdiń Ortalyq Azııadaǵy mańyzdy strategııalyq áriptesi. Bıyldan bastap, baýyrlas Ózbekstanmen seriktestigimizdiń, qarym-qatynasymyzdy nyǵaıtyp jatyrmyz. 52 adamnyń ómirin jalmaǵan qaıǵyly apatqa beı-jaı qaraı almaımyz jáne ózbek halqynyń qaıǵysyna ortaqtasýdy paryz dep sanaımyz. Aktsııanyń Ramazan aıynda uıymdastyrylýy tegin emes, ári ıdeıa negizinde ejelgi musylman dástúri - jarııa - sadaqa jatyr. Kúzgi ýaqytta pisken jemisterdi halyq jınap alady, saýaby Aqtóbede mert bolǵan ózbekstandyq jolaýshylarǵa beriledi dep úmittenemiz», - dep atap ótti «Altyn Orda» bıznes-klýbynyń tóraǵasy Marhabbat Balǵabaı.
Onyń aıtýynsha, Astana klımatyna tez jersinýi úshin kóshetter Soltústik Qazaqstan oblysynyń tálimbaǵynan alynǵan.
Óz kezeginde Ózbekstan Respýblıkasynyń Qazaqstandaǵy Elshisi Saıdıkram Nııazqodjaev oqys apatta barynsha qoldaý bildirgen Qazaqstan halqyna alǵys bildirdi.
«Qaıǵyly oqıǵa bolǵan kúni Qazaqstannyń úkimeti jáne tutas halqy jumyla kómektesken bolatyn. Qazaqstandaǵy tıisti organdar barlyq qajetti sharalardy jasady. Búgin otyryzylǵan jemis aǵashtary da eki el arasyndaǵy dostyqtyń asyl kórinisi. Bul ıgi shara týraly qaza tapqan ózbekstandyqtardyń otbasyna mindetti túrde jetkizemiz, aıtamyz», - dedi Elshi.
Sonymen birge, Ózbekstan elshisi kórshiles memleketter arasyndaǵy qarym-qatynastyń qarqyndy damyp kele jatqanyn basa aıtty.
«Bizdiń elimizge jańa basshynyń taǵaıyndalýymen strategııalyq qarym-qatynasymyzdyń da jańa paraǵy ashyldy. Bıylǵy jyl resmı túrde Qazaqstandaǵy Ózbekstan jyly dep jarııalandy, al 2019 jyl - Ózbekstandaǵy Qazaqstan jyly bolmaq. Oǵan qyzý daıyndyqtar bastalyp ta ketti. Qos memleket arasynda josparlanǵan birqatar sharalar atqaryldy. Kelesi aptada halyqaralyq forým men iskerlik keńeske qatysamyz. Eki el arasyndaǵy taýar aınalymy qarqyndy ósip keledi. Gýmanıtarlyq saladaǵy yntymaqtastyqtyń belgisi retinde búgingi rásimdi aıtýǵa bolady», - dep óz sózin túıindedi S. Nııazqojaev.
Aǵash otyrǵyzý rásimine astanalyq kásipkerler, ınvestorlar jáne qoǵam qaıratkerleri de belsene qatysty.
«Aqtóbede qaza tapqan ózbekstandyqtardyń otbasyna qaıǵyryp, kóńil aıtamyz. Búgingi aǵash otyrǵyzý rásimine balalarymyzdy ala keldik. Sebebi, olarǵa jaqsy amaldardy úıretip, úlgi kórsetkimiz keledi. Bizdiń klýb («Altyn Orda» bıznes-klýby - red.) qoǵamda bolyp jatqan oqıǵalarǵa únemi óz úndeýin bildiredi. Memlekettik qurylym men bıznes-qaýymdastyq arasynda baılanys ornatýǵa tyrysady. Qaıyrymdylyq jumystaryn da esh umytqan emespiz. Kómekke muqtaj jandarǵa barynsha kómektesemiz. Ózge qalalar da bul tájirıbeni qoldanyp, ózekti máselelerge nazar aýdarǵany jón», - deıdi «Alageum Electric» dırektorlar keńesiniń tóraǵasy Erkebulan Іlııasov.
Eske sala ketsek, bıylǵy qańtar aıynda «Samara-Shymkent» avtojolynda avtobýs órtenip, 52 adam tirideı janyp ketken bolatyn. Tiri qalǵan úsh júrgizýshi men eki jolaýshy sanavıatsııamen oblys ortalyǵyna jetkizildi. Olardan oqıǵanyń mán-jaıyna qatysty jaýap alyndy. Keıin avtobýs júrgizýshileri kúdikke ilinip, em-domdary aıaqtalǵan soń eki aıǵa, ıaǵnı 24 naýryzǵa deıin qamaýǵa alyndy. Keıinirek, Aqtóbeniń №2 qalalyq soty sanktsııa ýaqytyn taǵy bir aıǵa uzartty.
Aqtóbe oblystyq ІІD-niń málimetine súıensek, úsh júrgizýshige aıyp taǵylǵanymen, avtobýs ıesinen de jaýap alynyp jatyr. Júrgizýshiler Qylmystyq kodekstiń «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha sot aldynda jaýap beretin bolady.
