Aqtóbede merdigerlerden para alǵan basshynyń isi sotta qaralyp jatyr
AQTÓBE. KAZINFORM – Shalqar aýdandyq sáýlet, qurylys jáne qala qurylysy bóliminiń basshysy eki merdigerden mıllıondap para alǵany úshin aıyptalyp jatyr. Biri sý jelilerin qaıta jańǵyrtý, ekinshisi turǵyn úıge ınjenerlik ınfraqurylym tartý jobalarynyń merdigeri.
Іsti Shalqar aýdandyq soty qarap jatyr. Іs Qylmystyq kodekstiń «Para alý» babymen qozǵaldy. Aıyptaý aktisine súıensek, Shalqar aýdandyq sáýlet, qurylys jáne qala qurylysy bólimi men «Dáneker» JShS arasyndaǵy kelisim 2021 jyly jasalady.
Kelisimshart boıynsha uzyndyǵy 1030 shaqyrym bolatyn Kópmola, Jylan, Keńdala aýyldarynyń sý jelilerin qaıta jańǵyrtý jobasy qolǵa alyndy. Alǵashqy kezde jobaǵa 800 mln teńgege jýyq qarjy qajet dep eseptelip, jumys 2022 jyldyń jeltoqsanynda aıaqtalýy tıis edi. Keıin 2022-2023 jyldary jobaǵa qaıta túzetý engizilip, joba quny shamamen eki esege qymbattap 1,9 mlrd teńge boldy.
2024 jyly dál osy salaǵa, ıaǵnı Shalqar aýdandyq sáýlet, qurylys jáne qala qurylysy bóliminiń basshysy laýazymyna aıyptalýshy Shuǵa Sádýaqasova taǵaıyndaldy. Sol kezde ol «Dáneker» JShS-niń dırektorymen kezdesip, tanysady.
– Sh.Sádýaqasovanyń qabyldaý kezinde oryndalǵan jumys týraly aktilerin bekitýge, kelisimshartta belgilengen tártippen jáne merzimde aqy tóleýdi júrgizýge quzyreti bar. Ózine berilgen osy quzyretti jeke basyna paıdalaný, budan ári kelisimshart boıynsha oryndalǵan jumystardyń sapasyn teksermeı, jumystardy qabyldaý kezinde oryndalmaǵan jumystardy kedergisiz bekitý úshin «Dáneker» JShS-niń dırektory Ysqaqovtan para alýǵa oqtalǵan. Óziniń qylmystyq oıyn júzege asyrý maqsatynda 5 mln teńge talap etken. Onyń talabyn oryndamaǵan jaǵdaıda baqylaý men tekserý júrgizetinin eskertti. Para berýge ıtermeleı bastaǵan. Іs Qylmystyq kodeksiniń 366-bap 3-bóliginiń 1 tarmaǵymen, ıaǵnı, qorqytyp alý babymen saralanýy tıis. Ysqaqov para berýge májbúr bolyp, onyń talabyn oryndaýǵa jáne suraǵan sommany berýge kelisken. 2024 jyldyń qazan aıynda oryndalǵan jumys aktilerin bekitip, aqy tólegennen keıin beretinin eskertken. Qazan aıynyń oryndalǵan aktileri bekitilip, JShS esepshotyna 228 260 915 teńge aýdaryldy. Óz kezeginde Ysqaqov qylmystyq quqyqbuzýshylyq ekenin bilse de qorqyp, eki adamnyń esepshotyna 5,7 mln teńgeni para retinde aýdarǵan, - dedi sotta memlekettik aıyptaýshy.
Taǵy bir is Shalqar aýdandyq sáýlet, qurylys jáne qala qurylysy bólimi men «AzııaStroıProekt777» JShS arasynda boldy. Memlekettik mekeme men merdiger arasyndaǵy kelisim 2023 jyly jasaldy. Kelisim boıynsha Shalqar qalasyndaǵy 2 qabatty 8 páterli 3 jaldamaly-kommýnaldyq turǵyn úılerdiń syrtqy ınjenerlik - kommýnıkatsııasy júrgizilýi tıis. Joba quny – 71,8 mln teńge. 2024 jyly qosymsha kelisimshart jasalyp, jalpy quny 115,3 mln teńgege deıin ósti.
Bul epızodta da Shalqar aýdandyq Sáýlet, qurylys jáne qala qurylysy bóliminiń basshysy Shuǵa Sádýaqasova merdiger mekeme basshysymen tanysyp, sóılesip, jumys aktisin kedergisiz qabyldaýy úshin 8 mln teńgeden astam aqsha talap etken. JShS dırektory Myńbaev aqshany birneshe adamǵa aýdarady.
Sotta merdigerler aqsha aýdarǵan adamdar kýálik etedi. Sonymen birge qorǵaýshy Shalqar aýdanynyń ákimi Janbolat Jıdehanovty da kýágerler tizimine qosýdy surady.
Eske salsaq, sáýir aıynda Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 6 jylǵa bas bostandyǵynan aıyryldy. Olar jol salǵan qosalqy merdiger mekeme basshysymen kezdesip, oryndalǵan jumys jónindegi aktini esh kedergisiz qabyldaý úshin 200 myń teńge talap etken. Taǵy bir epızodta ekeýi káriz júıesine jaýapty merdigerden memlekettik satyp alý konkýrsyndaǵy somanyń 1%-yn surady.