Aqtóbede merdigerlerden para alǵan basshy sottaldy
AQTÓBE. KAZINFORM - Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasova para alǵany úshin 7 jylǵa bas bostandyǵynan aıyryldy. Sýdıa Aqtóbe oblysy ákimine jeke qaýly shyǵardy.
Qylmystyq is Shalqar aýdandyq sotynda qaraldy. Shilde aıynda bastalǵan sot otyrysy 4 aıǵa sozylyp, búgin úkim shyqty.
- Shuǵa Sádýaqasova Qylmystyq kodekstiń 366-baby 3-bóligi 1,4-tarmaqtary boıynsha kináli dep tanylyp, 7 jylǵa bas bostandyǵynan aıyrylsyn. Jazany qylmystyq atqarý júıesiniń ortasha mekemesinde óteý belgilensin. Sottalǵan Sádýaqasovadan paranyń qalǵan bóligi retinde alynǵan 2 mln 250 myń teńge memleket kirisine óndirilsin. Al 6 500 000 myń teńge sot úkimi kúshine engen soń memleket kirisine aýdarylsyn. Onyń qurbysynyń bank shotyndaǵy 5 mln teńge sot úkimi zańdy kúshine engen soń memleket kirisine berilsin, - dedi sýdıa Sulýshash Mahambetova.
Sonymen birge Shalqar aýdanyndaǵy memlekettik qyzmetshiler arasynda para alý dereginiń kóbeıýine baılanysty Aqtóbe oblysynyń ákimine jeke qaýly shyǵardy.
Eske salsaq, Shalqar aýdandyq sáýlet, qurylys jáne qala qurylysy bóliminiń basshysy eki merdigerden mıllıondap para alǵany úshin aıyptaldy. Biri sý jelilerin qaıta jańǵyrtý, ekinshisi turǵyn úıge ınjenerlik ınfraqurylym tartý jobalarynyń merdigeri.
Sottalýshy Shuǵa Sádýaqasova óz jaýabynda aqshanyń bir bóligin ákimge bergenin aıtty.
Sot jaryssózi kezinde prokýror para alý isinde oblys ákimi atyna jeke qaýly shyǵarýdy, sottalýshyny 7 jylǵa bas bostandyǵynan aıyrýdy surady.